Мой сайт

Пра адпусты

Касцёл не толькі заахвочвае да дабрачыннасці і пакаяння, але жадае таксама дапамагчы хрысціяніну праз заслугі Езуса Хрыста і святых атрымаць ад міласэрнага Айца адпушчэнне часовай кары за грахі.

Хрысціянін, які ўчыніў грэх, пасля споведзі атрымлівае адпушчэнне віны і дараванне вечнай кары за гэты грэх. Аднак споведзь не выбаўляе нас ад часовай кары за грахі, якую нам трэба адбыць на зямлі альбо ў чыстцы. Ад гэтай часовай кары за нашыя грахі выбаўляе нас праз адпусты Касцёл па праву даручанай яму ўлады. Дзякуючы адпустам вернікі могуць атрымаць выбаўленне ад часовай кары за грахі для сябе, а таксама для душаў, якія знаходзяцца ў чыстцы. Папа Павел VI ліквідаваў адпусты, акрэсленыя канкрэтным часам (напр., колькасцю дзён ці гадоў), бо ў вечнасці няма часу.

Поўнае альбо частковае адпушчэнне кары за грахі, звязана з выкананнем пэўных умоваў. Для атрымання адпусту трэба быць у стане ласкі,  прыняць святую Камунію, быць вольным ад  усялякай прывязанасці да якога-небудзь граху, нават лёгкага, прачытаць малітву ў інтэнцыі Святога Айца: Ойча наш... Вітай, Марыя... і Веру ў Бога... Некаторыя з гэтых умоваў могуць быць выкананы за некалькі дзён да альбо пасля ўзгаданых вышэй чынаў, звязаных з адпустам. Аднак пажадана, каб святая Камунія і малітва ў інтэнцыі Святога Айца мелі месца ў гэты ж дзень.

Вось пералік некаторых поўных і частковых адпустаў, пададзеных Апостальскай Пенітэнцыярыяй 29 чэрвеня 1969 г.:

за наведванне Найсвяцейшага Сакрамэнту – частковы адпуст; за адарацыю Найсвяцейшага Сакрамэнту на працягу 30 хвілін – поўны адпуст;

за атрыманне папскага  благаслаўлення (непасрэдна альбо па радыё ці тэлебачанні) Urbi et Orbi (гораду і свету) – поўны адпуст;

за ўдзел у рэкалекцыях, якія працягваюцца нават тры дні – поўны адпуст;

за наведванне могілак з 1 па 8 лістапада і малітву за памерлых – поўны адпуст; у іншыя дні – частковы адпуст;

за ўдзел ва ўрачыстым эўхарыстычным абрадзе на заканчэнне эўхарыстычнага кангрэсу – поўны адпуст;

за чытанне малітвы Душа Хрыстова – частковы адпуст;

за пабожнае чытанне Святога Пісання на працягу 30 хвілін з належным ушанаваннем слова Божага – частковы адпуст;

за малітву на ружанцы (адной з частак Ружанца) з разважаннем таямніц у касцёле, у публічнай капліцы, у сям'і, у манаскай супольнасці, у пабожным таварыстве – частковы адпуст;

за наведванне касцёла ў дзень парафіяльнага адпусту ці ў дзень апекуна гэтага касцёла альбо капліцы – поўны адпуст.

Пры выкарыстанні матэрыялаў сайта спасылка на Catholic.By абавязкова.

Набажэнства першых суботаў месяца – перапрашэннe Беззаганнага Сэрца Марыі

Падчас аб’яўленняў у Фаціме Маці Божая паабяцала тым, хто будзе перапрашаць Яе Беззаганнае Сэрца ў першыя суботы, што Яна будзе прысутнічаць у хвіліну іх смерці «разам з усімі ласкамі, патрэбнымі для збаўлення».

Чаму ўстаноўлена менавіта пяць перапрашальных суботаў?

«Дачка мая, – сказаў Езус сястры Люцыі, – прычына простая. Гэта датычыць пяці відаў знявагаў і абразаў, якімі зневажаецца Беззаганнае Сэрца Марыі». Затым Збаўца ўказаў на гэтыя знявагі:

Абраза Беззаганнага Зачацця;

Абраза Яе Дзявоцтва;

Абраза Яе Божага Мацярынства;

Усе тыя знявагі, якімі імкнуцца адкрыта пасеяць у сэрцах дзяцей абыякавасць, пагарду і нават нянавісць да Беззаганнай Маці;

Блюзнерствы, якімі зневажаюць Маці Божую ў Яе святых выявах.

Набажэнства першых суботаў павінна абудзіць у нас прагу пастаяннага перапрашэння Бога і Беззаганнага Сэрца Марыі за грахі, блюзнерствы і абыякавасць людзей. Тыя, хто практыкуе набажэнства першых суботаў, павінны вучыцца жыць у духу штодзённага перапрашэння, прыклад якога нам даюць фацімскія дзеці.

Умовы перапрашэння Беззаганнага Сэрца Марыі:

Споведзь у першую суботу месяца;

Святая Камунія ў першую суботу месяца;

Ружанец перапрашэння (5 таямніцаў).

Разважанне над таямніцай (15 хвілін).

Ружанец перапрашэння за знявагі, учыненыя Беззаганнаму Сэрцу Марыі

Ён адгаворваецца так, як звычайны Ружанец, з той розніцаю, што пасля кожнай малітвы Вітай, Марыя...  дадаюцца наступныя заклікі, у кожнай таямніцы іншыя:

Захавай і памнож у нас веру ў Тваё Беззаганнае Зачацце!

Захавай і памнож у нас веру ў Тваё непарушнае Дзявоцтва!

Захавай і памнож у нас веру ў Тваю годнасць сапраўднай Божай Маці!

Захавай і памнож у нас праслаўленне і любоў да Тваіх абразоў!

Распалі ва ўсіх сэрцах прагу набажэнства і любоў да Цябе.

Малітва

О Марыя, праз набажэнствы першых суботаў месяца прагну перапрасіць за пяць відаў знявагаў і абра2заў Твайго Беззаганнага Сэрца. Прымі гэта маё перапрашэнне за блюзнерствы, скіраваныя супраць Твайго Беззаганнага Зачацця, Твайго Дзявоцтва і Твайго Божага Мацярынства. Ахвярую Табе гэтае маё перапрашэнне, прашу прабачэння для тых, хто не прызнае Цябе за Маці ўсяго чалавецтва і хто сее ў сэрцах дзяцей абыякавасць, ігнараванне і нават нянавісць да Цябе. Урэшце прагну перапрасіць за знявагі, прычыненыя Табе тымі, хто дазваляе сабе апаганьваць Твае святыя выявы. Жадаючы суцешыць Тваё Беззаганнае Сэрца і дасягнуць спаўнення маіх просьбаў, прагну цяпер памаліцца гэты святы Ружанец.

Адгаворваецца 5 таямніцаў, як пры звычайнай малітве на ружанцы, толькi ў чарговых дзесятках Ружанца пасля кожнай малітвы Вітай, Марыя чытаецца адпаведная просьба (гл. с. 452).

Малітва анёла з Фацімы

(перапрашaльнaя)

О мой Езу, прабач нам грахі нашыя, захавай нас ад агню пякельнага, прывядзі ўсе душы на неба і дапамажы асабліва тым, каму найбольш патрэбна Твая міласэрнасць. (Чытаецца пасля кожнай таямніцы).

Малітва на заканчэнне

Каралева Ружанца святога, наша Фацімская Пані! Дзякую Табе за дапамогу, якую Ты мне аказала. Тваё фацімскае пасланне – гэта праява мацярынскай любові. Ты прагнеш усіх уратаваць і кожнага хочаш прывесці на неба.

Хвала і праслаўленне Айцу і Сыну, і Духу Святому за гэту поўную велічы Каралеву неба, за Яе фацімскае пасланне і за выслухоўванне нашых просьбаў. Амэн.

Малітва анёла з Фацімы
Праслаўленнe Бога

О Божа мой, веру ў Цябе, праслаўляю Цябе, давяраю Табе і люблю Цябе.

Прашу ў Цябе прабачэння для тых, хто не верыць у Цябе, не праслаўляе Цябе, не давярае Табе і не любіць Цябе. Амэн.

Малітва да Найсвяцейшай Тройцы

О Найсвяцейшая Тройца, Айцец, Сын і Дух Святы.

З глыбокаю пакораю хвалу Табе аддаю і ахвярую Табе Найсвяцейшае Цела і Кроў, Душу і Боскасць Пана нашага Езуса Хрыста, прысутнага на ўсіх алтарах усяго свету, як перапрашэнне за знявагі, святатацтва і абыякавасць, якімі Яго абражаюць.

Праз бясконцыя заслугі Яго Найсвяцейшага Сэрца і праз заступніцтва Беззаганнага Сэрца Марыі прашу ў Цябе ласкі навяртання бедных грэшнікаў. Амэн.

Святая гадзіна

Святая гадзіна адбываецца ў касцёле перад выстаўленым Найсвяцейшым Сакрамэнтам альбо асабіста – на ўспамін малітвы Хрыста ў садзе Аліўным. Ахвяруецца ў інтэнцыі суцяшэння Божага Сэрца, якое вельмі цярпела ў садзе Аліўным за нашыя грахі.

Вызнанне веры

С.: Верым, Пане Езу Хрыстэ, што 
з бясконцай любові да нас Ты ўстанавіў Найсвяцейшы Сакрамэнт.
Н.: О Езу, умацуй веру нашу!
С.: Верым, што ў кожнай Імшы святой праз святарскае служэнне перамяняеш сваёю ўсемагутнасцю хлеб і віно ў Цела і Кроў сваю!
Н.: О Езу, умацуй веру нашу!
С.: Верым, што ў гэтай Найсвяцейшай Гостыі прысутнічаеш з Целам і Крывёю, Душою і Боствам як наш Бог і Збаўца!
Н.: О Езу, умацуй веру нашу!
С.: Верым, бо Ты сам гэта аб’явіў, 
бо так вучыць Твой святы Каталіцкі Касцёл!
Н.: О Езу, умацуй веру нашу!
С.: Верым больш, чым калі б бачылі Цябе вочы нашыя і рукі дакраналіся да ранаў Тваіх, бо пачуцці падмануць нас могуць, а вера – ніколі.
Н.: О Езу, умацуй веру нашу!
С.: О Езу, умацуй веру нашу, каб бачылі мы Цябе не толькі вачыма веры, але і вачыма любові, і былі заўсёды мілымі Сэрцу Твайму.
Н.: Амэн.

Ушанаванне

С.: З найглыбейшаю вераю, пакораю і любоўю схіляемся да ног Тваіх, Божа ўсемагутны, і аддаем Табе пашану. Ушаноўваем Боства і Уцелаўленне Тваё, укрытае ў постаці хлеба.
Н.: Прымі, Езу, нашу глыбокую пашану!
С.: Ушаноўваем цела Тваё, за нас укрыжаванае, і кроў Тваю, за нас пралітую.
Н.: Прымі, Езу, нашу глыбокую пашану!
С.: Ушаноўваем Сэрца Тваё, для нас заўсёды адкрытае.
Н.: Прымі, Езу, нашу глыбокую пашану!
С.: Ушаноўваем Цябе за сябе і за тых, хто Цябе не ведае альбо, яшчэ горш, – словам і жыццём зневажае Цябе.
Н.: Прымі, Езу, нашу глыбокую пашану!
С.: Ушаноўваем Цябе з усімі душамі на зямлі і ў чыстцы, разам са святымі і анёламі ў небе, разам з Каралевай нашай Багародзіцай Марыяй.
Н.: Прымі, Езу, нашу глыбокую пашану!
С.: Ушаноўваем Цябе, Сыне Бога жывога, з Айцом і Духам Святым.
Н.: Няхай будзе праслаўлёны Найсвяцейшы Сакрамэнт, цяпер і заўсёды, і на векі вечныя. Амэн.

Удзячнасць

С.: Прымі, о Езу, нашу ўдзячнасць 
за ўсе ласкі, асабліва за гэты бясцэнны дар Тваёй любові, за тое, што ўстанавіў Найсвяцейшы Сакрамэнт.
Н.: Дзякуем Табе, Пане Езу!
С.: За тое, што дваццаць вякоў ахвяруешся штодзённа на кожным алтары.
Н.: Дзякуем Табе, Пане Езу!
С.: За тое, што прысутнічаеш няспынна ў кожным касцёле ва ўсім свеце.
Н.: Дзякуем Табе, Пане Езу!
С.: За тое, што нас паклікаў да свайго Вячэрніка, якім з’яўляецца Твой святы Касцёл, і дазваляеш нам удзельнічаць у Вячэры нябеснай.
Н.: Дзякуем Табе, Пане Езу!
С.: За тое, што прымаеш нашыя пакланенні, слухаеш нашыя просьбы і благаслаўляеш Твой люд.
Н.: Дзякуем Табе, Пане Езу!

Перапрашэнне

С.: Пане Езу, Божа ўсемагутны, з глыбіні сэрцаў нашых перапрашаем Цябе за ўсе знявагі, якія ад пачатку аж дагэтуль церпіш, за ўсе грахі, блюзнерствы і святатацтвы.
Н.: Перапрашаем Цябе, Божа!
С.: За ўсе занядбанні нядзельнай святой Імшы.
Н.: Перапрашаем Цябе, Божа!
С.: За занядбанне Велікоднай святой Камуніі, а таксама за недастойнае альбо непабожнае прыманне Цела і Крыві Тваёй.
Н.: Перапрашаем Цябе, Божа!
С.: За ўсялякія знявагі, учыненыя ў святынях Тваіх.
Н.: Перапрашаем Цябе, Божа!
С.: За ўсе грахі і нявернасць нашу.
Н.: Перапрашаем Цябе, Божа!
С.: За ўсялякую няўдзячнасць людскую.
Н.: Перапрашаем Цябе, Божа!

Ахвяраванне

С.: Ахвяруем Твайму Божаму Сэрцу сябе саміх і ўсё, што маем, як і Ты аддаў нам сябе самога. Ахвяруем розум, каб Цябе ўсё лепш спасцігаў, і сэрца, каб Цябе ўсё мацней любіла, і волю, каб Тваёй волі усё больш верна служыла, і ўсё жыццё нашае, каб на хвалу Тваю палымнела, і ўсю вечнасць нашу, каб вечна шанаваць і любіць Цябе бясконца. Нашу шчырую волю ахвяры выказваем словамі: «У рукі Твае аддаю, Божа, сябе самога, жыццё і смерць маю».

Н.: У рукі Твае аддаю, о Пане Божа!
С.: Усе мае імкненні, намеры і працу.
Н.: У рукі Твае аддаю, о Пане Божа!
С.: Усе мае радасці і смуткі.
Н.: У рукі Твае аддаю, о Пане Божа!
С.: Удачы і няўдачы мае.
Н.: У рукі Твае аддаю, о Пане Божа!
С.: Усіх, каго люблю і хто мяне любіць.
Н.: У рукі Твае аддаю, о Пане Божа!
С.: Прыяцеляў, іх дабро і пасвячэнне, ворагаў і паяднанне нашае.
Н.: У рукі Твае аддаю, о Пане Божа!
С.: Сем’і нашы і ўсё грамадства.
Н.: У рукі Твае аддаю, о Пане Божа!
С.: Касцёл Твой і Святога Айца.
Н.: У рукі Твае аддаю, о Пане Божа!
С.: Галодных, прагнучых, асірацелых і бяздомных.
Н.: У рукі Твае аддаю, о Пане Божа!
Ойча наш...

Суплікацыя

Святы Божа, Святы Моцны, Святы Несмяротны, змілуйся над намі! (Паўтараецца тройчы.)
Ад пажару, голаду, вайны і заразы, 
       – барані нас, Божа!
Ад раптоўнай і неспадзяванай смерці,
       – сцеражы нас, Божа!
Каб Касцёл свой святы каталіцкі
бараніць і ўзвышаць меў ласку, 
       – Цябе просім, Божа!
Каб Айца Святога і ўсе духоўныя станы
ў пабожнай еднасці захаваць меў ласку,  
       – Цябе просім, Божа!
Каб нас у святой службе Тваёй 
умацаваць меў ласку,
       – Цябе просім, Божа!
Каб нас да шчырага пакаяння 
давесці меў ласку, 
       – Цябе просім, Божа!
Каб ураджай даць 
і захаваць яго меў ласку, 
       – Цябе просім, Божа!
Мы, грэшныя, Цябе, Бога, просім, 
       – выслухай нас, Божа!
О, Езу, Езу, Езу,
       – змілуйся над намі!
О, Марыя, Панна і Маці Божая, 
       – заступіся за нас!

Малітва праслаўлення

Хай будзе Бог праслаўлёны.
Хай славіцца імя Яго святое.
Хай будзе праслаўлёны Езус Хрыстус, 
       сапраўдны Бог і Чалавек сапраўдны.
Хай будзе ўзвялічана імя Хрыстова.
Хай будзе праслаўлена 
       Найсвяцейшае Сэрца Езуса.
Хай будзе праслаўлена
       Найдаражэйшая Кроў Езуса.
Хай будзе ўзвялічаны Езус Хрыстус 
       у Найсвяцейшым Сакрамэнце.
Хай будзе праслаўлены 
       Дух Святы Суцяшыцель.
Хай будзе ўшанавана 
       Найсвяцейшая Панна Марыя.
Хай будзе ўшанавана 
       Яе святое і беззаганнае зачацце.
Хай будзе ўшанавана 
       поўнае хвалы Яе ўнебаўзяцце.
Хай будзе ўшанавана 
       імя Марыі, Панны і Маці.
Хай будзе ўшанаваны святы Юзаф, 
       Яе прачысты абраннік.
Хай славіцца Бог у сваіх анёлах 
       і ўсіх святых. Амэн.

Набажэнства да Найсвяцейшага Сэрца Езуса

Абяцанні, якія даў Езус Хрыстус св. Маргарыце Марыі Алякок для тых, хто ўшаноўвае Яго Боскае Сэрца:

Дам ім усе неабходныя ласкі.

Згода і спакой будуць панаваць у іх сем’ях.

Буду суцяшаць іх у кожным смутку.

Буду для іх бяспечным прытулкам пры жыцці, а асабліва – пры смерці.

Удзялю шчодрае благаслаўленне ўсім іхнім пачынанням.

Грэшнікі знойдуць у Маім Сэрцы крыніцу бясконцай міласэрнасці.

Абыякавыя душы стануцца адданымі.

Адданыя душы хутка дойдуць да вышыняў дасканаласці.

Буду благаслаўляць дамы, дзе будзе знаходзіцца і ўшаноўвацца абраз Майго Сэрца.

Святарам дам сілу зрабіць чулымі самыя зацвярдзелыя сэрцы.

Імёны тых, хто будзе пашыраць гэтае набажэнства, будуць упісаны ў Маё Сэрца і застануцца ў Ім назаўсёды.

Абяцаю ў шчодрай міласэрнасці Майго Сэрца, што ўсіх, хто на працягу дзевяці месяцаў у першыя пятніцы будзе прымаць святую Камунію, Мая ўсемагутная любоў адорыць ласкаю шчырага пакаяння; што не памруць ні ў стане без Маёй ласкі, ні без cвятых сакрамэнтаў, і што Сэрца Маё станецца для іх бяспечным прытулкам у часіну смерці.

Літанія да Найсвяцейшага Сэрца Езуса

Кірые, элейсон,           Хрыстэ, элейсон,  Кірые, элейсон.
Хрыстэ, пачуй нас,     Хрыстэ, выслухай нас.

Ойча з неба, Божа,                       – змілуйся над намі.
Сыне, Адкупіцель свету, Божа,  – змілуйся над намі.
Духу Святы, Божа,                      – змілуйся над намі.
Святая Тройца, адзіны Божа,     – змілуйся над намі.

Сэрца Езуса, Сына Айца Спрадвечнага,   – змілуйся над намі.
Сэрца Езуса, ва ўлонні Дзевы Маці Духам Святым створанае,
       – змілуйся над намі.
Сэрца Езуса, са Словам Божым істотна з’яднанае,
       – змілуйся над намі.
Сэрца Езуса, бязмежнай велічы,
       – змілуйся над намі.
Сэрца Езуса, святыня Бога,
       – змілуйся над намі.
Сэрца Езуса, сяліба Найвышэйшага,
       – змілуйся над намі.
Сэрца Езуса, доме Божы і брама неба,
       – змілуйся над намі.
Сэрца Езуса, палымнеючае вогнішча міласці,
       – змілуйся над намі.
Сэрца Езуса, справядлівасці і любові скарбніца,
       – змілуйся над намі.
Сэрца Езуса, дабрыні і любові поўнае,
       – змілуйся над намі.
Сэрца Езуса, усіх цнотаў глыбіня бяздонная,
       – змілуйся над намі.
Сэрца Езуса, усялякай хвалы найдастойнейшае,
       – змілуйся над намі.
Сэрца Езуса, Валадар і з’яднанне ўсіх сэрцаў,
       – змілуйся над намі.
Сэрца Езуса, у якім усе скарбы мудрасці і ўмеласці,
       – змілуйся над намі.
Сэрца Езуса, у якім уся паўната Боства,
       – змілуйся над намі.
Сэрца Езуса, упадабанне Айца Нябеснага,
       – змілуйся над намі.
Сэрца Езуса, з паўнаты якога мы ўсе атрымалі,
       – змілуйся над намі.
Сэрца Езуса, прага адвечных вышыняў,
       – змілуйся над намі.
Сэрца Езуса, цярплівае і вялікай міласэрнасці,
       – змілуйся над намі.
Сэрца Езуса, шчодрае для ўсіх, хто да Цябе звяртаецца,
       – змілуйся над намі.
Сэрца Езуса, крыніца жыцця  і святасці,
       – змілуйся над намі.
Сэрца Езуса, 
уміласціўленне за грахі нашыя,
       – змілуйся над намі.
Сэрца Езуса, напоўненае знявагамі,
       – змілуйся над намі.
Сэрца Езуса, злачынствамі нашымі змучанае, 
       – змілуйся над намі.
Сэрца Езуса, паслухмянае ажно да смерці,
       – змілуйся над намі.
Сэрца Езуса, дзідай прабітае,
       – змілуйся над намі.
Сэрца Езуса, крыніца ўсялякага суцяшэння,
       – змілуйся над намі.
Сэрца Езуса, жыццё і ўваскрашэнне нашае,
       – змілуйся над намі.
Сэрца Езуса, супакой і паяднанне нашае,
       – змілуйся над намі.
Сэрца Езуса, жывая ахвяра за грахі нашыя,
       – змілуйся над намі.
Сэрца Езуса, збаўленне тых, 
хто на Цябе спадзяецца,
       – змілуйся над намі.
Сэрца Езуса, надзея тых, хто ў Табе памірае,
       – змілуйся над намі.
Сэрца Езуса, радасць усіх святых, 
       – змілуйся над намі.

Баранку Божы, які бярэш на сябе грахі свету, 
       – даруй нам, Пане.
Баранку Божы, які бярэш на сябе грахі свету, 
       – выслухай нас, Пане.
Баранку Божы, які бярэш на сябе грахі свету, 
       – змілуйся над намі.

С.: Езу ціхі і пакорны сэрцам,
Н.: Учыні сэрцы нашыя да Твайго падобнымі.

Молімся: Усемагутны вечны Божа, глянь на Сэрца наймілейшага Сына свайго, на хвалу і ахвяру, якую Ён складае Табе за нас, грэшных. Змілуйся над тымі, хто просіць Тваёй міласэрнасці і даруй ім у імя Сына свайго Езуса Хрыста. Які з Табою жыве і валадарыць на векі вечныя.

Н.: Амэн.

Прысвячэнне роду людскога Найсвяцейшаму Сэрцу Езуса

С.: О Езу наймілейшы, Адкупіцель роду людскога, глянь на тых, хто пакорна схіляецца да падножжа Твайго алтара.

Н.: Мы Твая ўласнасць і Табе належаць хочам.

С.: Сёння кожны з нас шчыра аддаецца Найсвяцейшаму Сэрцу Твайму, каб яшчэ больш з’яднацца з Табою. Многія зусім не ведаюць Цябе, многія адвярнуліся ад Цябе, пагарджаючы запаведзямі Тваімі. Змілуйся над аднымі і другімі,

о Езу найласкавейшы, і прытулі ўсіх да святога Сэрца свайго. Валадаром будзь нам, о Езу, – не толькі вернікам, якія ніколі не адступіліся ад Цябе, але і сынам марнатраўным, якія Цябе пакінулі.
Н.: Дапамажы, каб як найхутчэй вярнуліся яны ў бацькоўскі дом і не згінулі ад нястачы і голаду.

С.: Будзь Валадаром для тых, хто памылкова ці праз нязгоду адлучыўся ад Цябе, прывядзі іх да прыстанку праўды і адзінства веры, каб хутка настала адна аўчарня і адзін пастыр. Адары Касцёл Твой бяспечнаю свабодаю. Дай усім народам супакой і згоду. Учыні, каб на ўсёй зямлі, ад краю да краю, адзін узносіўся голас

Н.: Хвала Божаму Сэрцу, праз якое прыйшло для нас збаўленне. Яму хвала і пашана навекі. Амэн.

Перапрашэнне Найсвяцейшага Сэрца Езуса

С.: Пане Езу Хрыстэ, мы, што сабраліся ў гэтай святыні, хочам пакланіцца Твайму Найсвяцейшаму Сэрцу, поўнаму бязмежнай любові. Усведамляючы сваю няўдзячнасць і зневажанне Тваёй любові, хочам перапрасіць Цябе за нашыя грахі.

С.: За грэх бязвер’я, за знішчэнне веры ў сэрцах дзяцей і моладзі, за пагарджанне Тваімі запаведзямі ў нашым асабістым і грамадскім жыцці, за тое, што хоць і з’яднаныя мы з Табою праз святы хрост, але не імкнемся больш пазнаць і палюбіць Цябе.
Н.: Даруй, Пане, даруй народу Твайму, бо навекі міласэрнасць Твая.
С.: За знявагу святаў, за непатрэбную працу ў нядзелю і святочныя дні, а таксама за марнаванне часу коштам святой Імшы і нягоднае прыманне святой Камуніі, за ўсялякую абыякавасць у адносінах да Цябе, які прысутнічаеш у Найсвяцейшым Сакрамэнце.

Н.: Даруй, Пане, даруй..

С.: За разбіццё сужэнстваў і парушэнне сужэнскай вернасці, за забойства ненароджаных дзяцей, за грахі п’янства, за распусту і за кожны дрэнны прыклад, які мы далі нашым бліжнім.
Н.: Даруй, Пане, даруй..

С.: За нешанаванне грамадскай маёмасці, за несумленнасць у працы, за ўсялякую нядобразычлівасць і абыякавасць да патрэбаў людзей, за ўсё, што супярэчыць Тваёй запаведзі любові.
Н.: Даруй, Пане, даруй..

С.: За недахоп мужнасці ў вызнаванні Цябе і адказнасці за Твой Касцёл, за тое, што ставілі матэрыяльныя каштоўнасці вышэй за Цябе, за абыякавасць бацькоў і дарослых да хрысціянскага выхавання дзяцей і моладзі, за тое, што не сведчым аб Табе ў свеце, які нас акружае.

Н.: Даруй, Пане, даруй...

С.: Пане, пачуй малітвы нашыя.
Н.: А просьбы нашыя няхай да Цябе дойдуць

.Молімся: Сэрца Езуса, найдастойнейшае любові, у знак нашай удзячнасці 
і дзеля направы крыўды, нанесенай Табе праз нашыя правіны, аддаем Табе нашыя сэрцы і абяцаем, з ласкі Тваёй больш ніколі не абражаць Цябе. Просім, умацуй нас у гэтым пастанаўленні.
Н.: Амэн.

Малітва да Хрыста Валадара

Пане Езу Хрыстэ, прызнаем Цябе за Валадара сусвету. Усё, што сталася, створана для Цябе. Ажыццяўляй адносна нас усе Твае правы. Аднаўляем абяцанні, якія мы давалі ў час хросту. Выракаемся сатаны і ўсялякай яго пыхі, і ўсіх спраў ягоных і абяцаем жыць, як належыць добрым хрысціянам, а перадусім абавязваемся рабіць усё дзеля таго, каб перамаглі правы Бога і Твайго Касцёла. Боскае Сэрца Езуса, ахвяруем Табе нашыя добрыя памкненні дзеля таго, каб усе сэрцы прызналі Тваю святую каралеўскую ўладу і каб Валадарства Твайго супакою ўмацавалася ва ўсім свеце. Амэн.

Адарацыя Найсвяцейшага Сакрамэнту

Уступная малітва

С.: Пане Езу Хрыстэ, паглядзі літасціва на тых, хто пакорна схіляецца да падножжа Твайго алтара. Дай нам ласку моцнай веры ў цудадзейную прысутнасць Тваю на гэтым алтары, каб мы зразумелі, што Ты – наш найлепшы прыяцель і Айцец. Учыні, каб гэтыя хвіліны адарацыі ўзмацнілі нас у добрых імкненнях і абяцаннях. Просім, выслухай малітвы нашыя.

Н.: Літасцівы Збаўца наш, вось мы стаім сёння перад Табою, нашым Уладаром і найлепшым прыяцелем. Прыходзім аддаць Табе найглыбейшую пашану і падзякаваць за ўсе бясцэнныя дабрадзейнасці Твае.

Ахвяруем Табе гэтыя хвіліны малітвы каля трона Твайго:
– за Айца Святога, біскупа нашага і ўвесь Касцёл святы;
– за Айчыну нашу;
– за нас саміх, за бацькоў і за родных нашых, а таксама ў інтэнцыі, у якой кожны з нас сёння асабліва жадае маліцца.

С.: Пане Езу, бясконцая любоў Твая да нас прымусіла Цябе застацца з намі ў Найсвяцейшым Сакрамэнце. Ты знаходзішся тут – той самы, які хадзіў па свеце, навучаў, лячыў і так моцна палюбіў чалавека.

Н.: Верым усёй душою, што Ты, о Езу, знаходзішся на гэтым алтары жывы, хоць укрыты, як Бог і як Чалавек.

Верым, з любоўю глядзіш Ты ў гэтую хвіліну на нас, хоць мы не бачым Цябе, і не чуем голасу Твайго. Верым, што знаходзішся тут дзеля таго, каб мы маглі часта прыходзіць да Цябе як да найлепшага прыяцеля і Айца. Верым, што ў гэтым Найсвяцейшым Сакрамэнце прагнеш быць частым узмацненнем душ нашых.

Ушанаванне

С.: О Езу, Пане і Божа наш! Верым, што знаходзішся на гэтым алтары і аддаем Табе паклон у найглыбейшай пакоры і пашане разам з усімі Тваімі святымі і анёламі.
Н.: Кланяемся Табе, о Езу.
С.: З нашымі Анёламі Ахоўнікамі.
Н.: Кланяемся Табе, о Езу.
С.: З наймілейшай Маці Тваёй, Найсвяцейшай Паннай Марыяй.
Н.: Кланяемся Табе, о Езу.

Славім Цябе, благаслаўляем Цябе, дзякуем Табе, ушаноўваем Цябе, о Езу, які з любові да нас устанавіў Найсвяцейшы Сакрамэнт, каб у ім з намі заўсёды знаходзіцца і быць штодзённым узмацненнем для душ нашых. Праслаўляем Цябе за гэта, шануем і дзякуем.

Перапрашэнне

С.: О добры Езу, мы ўдзячныя Табе 
за ўсе дабрадзейнасці. Шкадуем, што мы так часта імі злоўжывалі, прагнем сёння Табе аддзячыць і перапрасіць Цябе:

За занядбанне і неналежнае чытанне малітваў штодзённых.
Н.: Перапрашаем Цябе, Пане!
С.: За вымаўленне без належнай пашаны імёнаў святых.
Н.: Перапрашаем Цябе, Пане!
С.: За непабожныя паводзіны ў касцёле і няўважлівасць падчас святой Імшы.
Н.: Перапрашаем Цябе, Пане!
С.: За неналежную падрыхтоўку да святой Камуніі і абыякавасць пасля прыняцця Цябе ў сэрцы нашыя.
Н.: Перапрашаем Цябе, Пане!
С.: За гнеў, зайздрасць і назалянне іншым.
Н.: Перапрашаем Цябе, Пане!
С.: За нясціплыя думкі, жарты і ўчынкі.
Н.: Перапрашаем Цябе, Пане!
С.: За грахі ўсіх людзей.
Н.: Перапрашаем Цябе, Пане!

Надзея

С.: Без Тваёй ласкі, о Езу, мы слабыя, але Ты падасі нам руку дапамогі.
Н.: Давяраем Табе, о Езу!
С.: Шмат спакусаў у свеце змагаецца за сэрцы нашыя, але Ты ўзмоцніш нашу добрую волю.
Н.: Давяраем Табе, о Езу!
С.: Абяцаем, што дойдзем калісьці да Цябе.
Н.: Давяраем Табе, о Езу!
С.: Найсвяцейшае Сэрца Езуса!
Н.: На Цябе ўскладаем надзею!

Любоў

С.: Пане Езу, Ты ўмілаваў нас першы, сышоў з нябёсаў і стаўся чалавекам, быў маленькім дзіцяткам, цярпеў холад, нястачу, бяду.
Н.: З любові да нас.
С.: Працай рамесніка зарабляў на сваё жыццё трыццаць гадоў. Хадзіў па свеце, навучаючы і ўсім чынячы дабро.
Н.: З любові да нас.
С.: Дазволіў сябе мучыць, бічаваць, цернем каранаваць; нёс цяжкі крыж на гару Кальварыю, дазволіў сябе ўкрыжаваць.
Н.: З любові да нас.
С.: Але перад смерцю, каб нам аказаць яшчэ большую любоў, устанавіў Найсвяцейшы Сакрамэнт, застаўся з намі ў постаці хлеба і знаходзішся на гэтым алтары.
Н.: З любові да нас.
С.: О добры Езу, прагнем Цябе за гэта любіць.
Н.: Мы хочам любіць Цябе, як любяць Цябе анёлы і святыя ў небе!
С.: Мы хочам пакласці да ног Тваіх плён працы і дабрадзейнасцяў, годных Цябе!
Н.: Мы хочам быць асвячанымі як найхутчэй!
С.: Мы хочам пакорна прынесці Табе сэрцы нашыя, створаныя на падабенства Божага Сэрца Твайго.
Н.: О добры Езу, не маем нічога, што было б годным Цябе і што маглі б ахвяраваць Табе, акрамя добрых нашых пажаданняў.
С.: О Езу ў Найсвяцейшым Сакрамэнце, наш найлепшы прыяцель і Ойча, усім сэрцам любім Цябе!
Н.: О Езу ў Найсвяцейшым Сакрамэнце, усім сэрцам любім Цябе! Больш за ўсе выгоды, больш за прыемнасці, больш за саміх сябе, больш за жыццё нашае! Любім толькі Цябе!

Духоўная Камунія

С.: О Езу, які прагнеш быць узмацаваннем душ нашых.
Н.: Прыйдзі да нас! Прагнем прыняць Цябе, сумуем без Цябе, дай нам сябе самога, дай нам ласкі свае, асвяці і ўмацуй душы нашыя і застанься з намі назаўсёды.

Хвіліна роздуму – размаўляй з Панам Езусам у сваім  сэрцы.

С.: О Езу, мы Табе належым.
Н.: Табе саміх сябе і ўсё, што маем, аддаем і разам з душою і целам аддаемся Табе навекі.

Просьбы

С.: Пане Езу Хрыстэ, Ты сказаў: «Калі чаго ў імя Маё просіце ў Айца, дасць вам» (Ян 16, 23).
Н.: Каб мы маглі любіць Цябе ўсё больш.
С.: Памолімся за Айца Святога і ўвесь святы Касцёл, за нашага біскупа і нашу дыяцэзію, за нашу парафію 
і нашых святароў.
Н.: Ойча наш...
С.: За нашых бацькоў, за родных нашых, выхавацеляў і настаўнікаў, за ўсіх хворых, засмучаных і пакутуючых, за ўсіх грэшнікаў, асабліва за тых, якія сёння адыдуць з гэтага свету.
Н.: Ойча наш...
С.: За нашу Айчыну і за тых, хто ёю кіруе, за згоду і супакой між народамі.
Н.: Ойча наш...
С.: За ўсіх памерлых, асабліва за памерлых бацькоў і родных нашых.
Н.: Ойча наш...
С.: Вечны адпачынак дай ім, Пане.
Н.: А святло вечнае няхай ім свеціць.
С.: Няхай адпачываюць у супакоі.
Н.: Амэн.

Набажэнства да Найсвяцейшай Тройцы

Малітоўныя заклікі

С.: У імя Айца і Сына, і Духа Святога.
Н.: Амэн.
Бог Айцец нас стварыў, Бог Сын нас адкупіў, Бог Дух Святы нас асвячае.

Альбо

Перакананыя ў гэтых бясконцых ласках, у духу ўдзячнасці і пакорнай просьбы молімся да Найсвяцейшай Тройцы: Цябе заклікаем, Цябе просім, о Найсвяцейшая Тройца!
Н.: Цябе заклікаем, Цябе просім, о Найсвяцейшая Тройца!

– Ратуй стварэнне, дай  суцяшэнне!
– Спашлі Духа свайго ў сэрца маё!
– Дапамажы ў патрэбе таму, хто просіць Цябе!
– Даруй нам правіны дзеля Тваёй літасці!
– Адхiлі голад, войны, учыні час спакойным!
– Дай дар любові і пабожнасці!
– Давай шчасце Твайму люду як свайму!
– Сцеражы ў ім жывых, барані канаючых!
– Дай нам быць у небе, просім Цябе!

С.: Благаслаўлёны Ты, Пане, на небе.
Н.: Праслаўлены і годны бясконцай хвалы навекі.

С.: Пане, выслухай малітву нашу.
Н.: А просьбы нашыя няхай да Цябе дойдуць.

Альбо

С.: Вызнаем нашую веру ў Бога ў Святой Тройцы Адзінага, паўтараючы: верым у Цябе. 
Н.: Верым у Цябе.

– Божа Ойча ўсемагутны, які ў сваёй спрадвечнай мудрасці стварыў сусвет і няспынна яго аднаўляеш.
– Божа Ойча, які ў сваёй бясконцай міласэрнасці справядліва кіруеш усім светам.
– Сыне Божы, які з невыказнай любові да чалавека стаўся ва ўсім падобным да нас, акрамя граху.
– Сыне Божы, які аддаў сваё жыццё на крыжы, каб збавіць чалавецтва.
– Духу Святы, які сваім святлом адорваеш людзей ва ўсе часы.
– Духу Святы, які ствараеш чыстыя сэрцы і напаўняеш іх любоўю.

С.: Няхай будзе праслаўлена Найсвяцейшая Тройца і непадзельная еднасць, бо аб’явіла нам сваю міласэрнасць. 
Н.: Амэн.

Літанія да Найсвяцейшай Тройцы
(для прыватнага чытання)

Кірые, элейсон, 
Хрыстэ, элейсон, Кірые, элейсон.
Хрыстэ, пачуй нас, 
Хрыстэ, выслухай нас.

Ойча з неба, Божа,                       – змілуйся над намі.
Сыне, Адкупіцель свету, Божа,   – змілуйся над намі.
Духу Святы, Божа,                       – змілуйся над намі.
Святая Тройца, адзіны Божа,      – змілуйся над намі.

Найсвяцейшая Тройца, адзіны Божа, праз якога і ў якім усё існуе, 
       – змілуйся над намі.
Найсвяцейшая Тройца, адзіны Божа, які Провідам сваім як Айцец усім кіруеш,
       – змілуйся над намі. 
Найсвяцейшая Тройца, адзіны Божа, літасцівы, цярплівы і вялікай міласэрнасці, 
       – змілуйся над намі.
Найсвяцейшая Тройца, адзіны Божа, Валадар над валадарамі, Пан над усімі пануючымі, 
       – змілуйся над намі.
Найсвяцейшая Тройца, адзіны Божа, які не жадаеш згубы грэшнага чалавека, 
       – змілуйся над намі.
Найсвяцейшая Тройца, адзіны Божа, які тых, хто пакутуе, атуляеш сваёю ласкаю, 
       – змілуйся над намі.
Найсвяцейшая Тройца, адзіны Божа, імя якога – Бясконцая Міласэрнасць,  
       – змілуйся над намі.

Будзь да нас літасцівы, – даруй нам, Пане.
Будзь да нас літасцівы, – выслухай нас, Пане.

Ад зла ўсялякага 
       – выбаў нас, Пане.
Ад пажару, голаду, вайны і заразы 
       – выбаў нас, Пане.
Ад раптоўнай і неспадзяванай смерці
       – выбаў нас, Пане.
Праз усемагутнасць Тваю, Бога Айца і Стварыцеля нашага,
       – выбаў нас, Пане.
Праз уцелаўленне, муку і смерць Тваю, Бога Сына, Збаўцы нашага,
       – выбаў нас, Пане.
Праз асвячэнне Тваё, Бога Духа Святога, 
Суцяшыцеля нашага, 
       – выбаў нас, Пане.
Праз заступніцтва Найсвяцейшай Панны Марыі і ўсіх святых Тваіх 
       – выбаў нас, Пане.

Мы, нягодныя стварэнні Твае, просім Цябе 
       – выслухай нас, Пане.
Каб мы Цябе, Бога нашага, усім сэрцам, усёю душою і ўсёю моцаю нашаю любілі, 
       – выслухай нас, Пане.
Каб мы запаведзі Твае і навуку верна захоўвалі,
       – выслухай нас, Пане.
Каб згоду і супакой паміж уладаю і людзьмі 
       – выслухай нас, Пане.
Ты памножыць меў ласку, 
       – выслухай нас, Пане.
Каб край наш  ад усялякіх суровых пакаранняў Тваёй справядлівасці захаваць меў ласку, 
       – выслухай нас, Пане.
Каб нам грахі нашыя адпусціць і да хвалы Твайго Валадарства прыняць меў ласку, 
       – выслухай нас, Пане.

Святы Божа, Святы Моцны, Святы Несмяротны, 
       – даруй нам, Пане.
Святы Божа, Святы Моцны, Святы Несмяротны, 
       – выслухай нас, Пане.
Святы Божа, Святы Моцны, Святы Несмяротны, 
       – змілуйся над намі.

Молімся: Усемагутны вечны Божа, які даў сваім слугам у вызнаванні сапраўднай веры пазнаць хвалу Тройцы вечнай і ў сіле велічы ўслаўляць еднасць Боскасці, пакорна просім, каб мы сілаю гэтай веры заўсёды былі захаваныя ад усялякай небяспекі. Які жывеш і валадарыш на векі вечныя.

Усе: Амэн.

Малітва да Найсвяцейшай Тройцы

Дзякуем Табе, Божа, што меў ласку аб’явіць нам праўду аб сабе, адзіным Богу, які жывеш у Трох Асобах. Спрадвечны, святы і ўсемагутны Божа Ойча, спрадвечны, святы і ўсемагутны Сыне Божы, спрадвечны, святы і ўсемагутны Духу Святы, няхай праслаўляюць Цябе ўсе народы. Божа, у Тройцы адзіны, веру, што Ты прабываеш у нас дзякуючы асвячальнай ласцы, веру, што, атрымліваючы Божае жыццё, мы прымаем таксама і Цябе.

Божа, Ты робіш нас высакароднымі, асвячаеш нас і ўзвышаеш, каб станавіліся мы годным памяшканнем для Цябе. Дзякуем Табе за гэтую вялікую ласку. Святы Божа, пакорна просім Цябе: кіруй намі, падтрымлівай у нас веру ў Тваю прысутнасць, дапамагай нам, каб ва ўсіх учынках мы памяталі пра сваю годнасць і праз хрысціянскае жыццё выказвалі сваю ўдзячнасць за ласку Твайго, Божа, жыцця ў нас.

Удзяляй нам таксама, Божа ў Тройцы адзіны, вялікі дар трывання ў добрым да канца свайго жыцця, а пасля дазволь нам сузіраць Цябе тварам у твар, жыць з Табою вечна і цешыцца бясконцым прабываннем з Табою. Амэн.

Малітва св. Аўгустына да Найсвяцейшай Тройцы

 Усемагутны Пане, у Тройцы адзіны Божа, які быў, ёсць і будзеш навекі! Табе давяраю сёння і на ўсе часы душу, цела, пачуцці мае, усе думкі мае, словы і ўчынкі, веру і нястомнасць у добрым, каб Ты сцярог іх кожную хвіліну майго жыцця. Выслухай мяне, о Найсвяцейшая Тройца, і абарані мяне ад усялякага зла, асабліва ад кожнай нявернасці ў адносінах да Цябе, ад усіх нагодаў да граху і ад усіх бачных і нябачных непрыяцеляў.

Прашу аб гэтым праз заступніцтва Найсвяцейшай Панны Марыі, праз малітвы святых патрыярхаў, заступніцтва святых Апосталаў, вернасць мучанікаў, чыстасць паннаў і заслугі Тваіх выбраных слугаў. Амэн.

Набажэнства да Духа Святога

Літанія да Духа Святога
(для прыватнага чытання)
 

Кірые, элейсон,          Хрыстэ, элейсон, Кірые, элейсон.
Хрыстэ, пачуй нас,    Хрыстэ, выслухай нас.

Ойча з неба, Божа,        – змілуйся над намі.
Сыне, Адкупіцель свету, Божа, 
       – змілуйся над намі.
Духу Святы, Божа, 
       – змілуйся над намі.
Святая Тройца, адзіны Божа, 
       – змілуйся над намі.

Духу Святы мудрасці, 
       – змілуйся над намі.
Духу Святы розуму,
       – змілуйся над намі.
Духу Святы рады,
       – змілуйся над намі.
Духу Святы мужнасці,
       – змілуйся над намі.
Духу Святы ўмеласці,
       – змілуйся над намі.
Духу Святы пабожнасці,
       – змілуйся над намі.
Духу Святы боязі Божай,
       – змілуйся над намі.
Духу Святы, 
    Святло прарокаў і Апосталаў,
       – змілуйся над намі.
Духу Святы, наш Суцяшыцелю, 
       – змілуйся над намі.

Будзь да нас літасцівы,        – даруй нам, Духу Святы, Божа.
Будзь да нас літасцівы,        – выслухай нас, Духу Святы, Божа.

Ад празмернага спадзявання на Божую міласэрнасць,   – выбаў нас, Духу Святы, Божа.
Ад усялякай роспачы і сумнення ў Божай ласцы,
       – выбаў нас, Духу Святы, Божа.
Ад супраціўлення спазнанай праўдзе веры,
       – выбаў нас, Духу Святы, Божа.
Ад зайздрасці бліжняму, які мае Божую ласку,
       – выбаў нас, Духу Святы, Божа.
Ад закамянеласці сэрца,
       – выбаў нас, Духу Святы, Божа.
Ад смерці без пакаяння,
       – выбаў нас, Духу Святы, Божа.
Ад усялякіх злых і распусных учынкаў і думак,
       – выбаў нас, Духу Святы, Божа.
Ад раптоўнай і неспадзяванай смерці,
       – выбаў нас, Духу Святы, Божа.
Ад кары вечнай,
       – выбаў нас, Духу Святы, Божа.
Праз цудадзейную справу Тваю пры зачацці Езуса Хрыста,
       – выбаў нас, Духу Святы, Божа.
Праз прыйсце Тваё ў языках вогненных,
       – выбаў нас, Духу Святы, Божа.

Мы, грэшныя, Цябе просім,                  – выслухай нас, Духу Святы, Божа.
Каб Касцёл  Твой святы накіроўваць і захоўваць у згодзе меў ласку,
       – выслухай нас, Духу Святы, Божа.
Каб нас у пабожнасці і пакоры ўзмацніць меў ласку,
       – выслухай нас, Духу Святы, Божа.
Каб нас сталасцю і мужнасцю адарыць меў ласку,
       – выслухай нас, Духу Святы, Божа.
Каб думкі нашыя да жадання нябесных спраў узнесці меў ласку,
       – выслухай нас, Духу Святы, Божа.
Каб нас ачысціць і для годнага жыцця дзеля Цябе прысвяціць меў ласку,
       – выслухай нас, Духу Святы, Божа.
Каб нас у цярпенні нашым суцешыць меў ласку,
       – выслухай нас, Духу Святы, Божа.
Каб нас у міласці сваёй упэўніць меў ласку,
       – выслухай нас, Духу Святы, Божа.
Каб нас усіх да хвалы вечнай давесці меў ласку,
       – выслухай нас, Духу Святы, Божа.
Каб мы Цябе любілі і дзеля Цябе грахоў асцерагаліся, 
       – выслухай нас, Духу Святы, Божа.

Баранку Божы, які бярэш на сябе грахі свету,        – даруй нам, Пане.
Баранку Божы, які бярэш на сябе грахі свету,        – выслухай нас, Пане.
Баранку Божы, які бярэш на сябе грахі свету,        – змілуйся над намі.

С.: Сэрца чыстае ствары ўва мне, Божа.
Н.: І духа справядлівасці аднаві ў душы маёй.
С.: Пане, выслухай малітвы нашыя.
Н.: А просьбы нашыя няхай да Цябе дойдуць.

Молімся: Прыйдзі, Духу Святы, напоўні сэрцы сваіх верных і запалі ў іх агонь Тваёй любові, які сабраў усе народы ў адзінстве веры, каб Твая ласка асвяціла нашыя сэрцы і ахоўвала нас ад усялякага зла. Праз Хрыста, Пана нашага.

Н.: Амэн.

Малітва да Духа Святога

Духу Святы, які сышоў у самым пачатку Касцёла на Апосталаў і верных, каб асвяціць іх розум, запаліць сэрцы і ўмацаваць у веры. Просім Цябе: будзь заўсёды таксама з намі, напаўняй нас Тваімі дарамі, прасвятляй у сумненнях, суцяшай у смутку, ратуй у небяспецы, выбаўляй ад памылак, падымай пры падзенні, кіруй намі мудрасцю Тваёй, яднай нас узаемнай хрысціянскай любоўю, каб усе мы жылі ў згодзе і святой еднасці як адна Божая сям’я. Давядзі ўсіх нас да шчаслівай вечнасці, каб там з усімі анёламі і святымі мы выказвалі Табе ўдзячнасць і хвалу на векі вечныя. Амэн.

Ойча наш... Вітай, Марыя... Хвала Айцу...

Малiтва аб сямi дарах Духа Святога

Дух Найсвяцейшы, Суцяшыцель, які асвячаеш душы нашыя! Дай мне дар мудрасці, каб асягнуў я і палюбіў спрадвечную Праўду і ніколі не аддаваў перавагі багаццям гэтага свету перад вечнымі.

Асвяці мяне дарам розуму, каб спасціг, наколькі дазваляе недасканаласць людская, абвешчаныя Табою праўды веры.

Асвяці мяне дарам рады, каб быў разважлівым пры небяспецы жыцця на зямлі і здзяйсняў волю Божую.

Дай мне дар мужнасці, каб перамагаў спакусы ворага і пераносіў магчымы пераслед.

Адары ўмеласцю, каб пераканаўся я ў сваёй нязначнасці і ў велічы спраў, Табою створаных. Каб усё адносіў да Бога паводле пачуццяў Сэрца Езуса і пагарджаў марнасцю гэтага свету.

Дай мне дар пабожнасці, каб прывіў у сабе любоў да разважання ў малітве і ў тым, што адносіцца да службы Божай.

Дай мне дар боязі Божай, каб старанна ўхіляўся ад усяго, што магло б пакрыўдзіць Цябе, каб баяўся граху больш, чым смерці, і гэта толькі з-за любові да Цябе.

Да гэтых усіх дароў, о Духу Святы, дай дар пакаяння, каб аплакваў грахі свае і мог задаволіць Божую справядлівасць.

Напоўні, Духу Святы, сэрца маё Божай любоўю, ласкаю і вытрымкаю, каб жыў я па-хрысціянску і памёр

Амэн.

Песні жальбы

Песні жальбы ўзніклі ў Польшчы на пачатку ХVІІІ ст. Першы раз іх праспявалі ў касцёле Святога Крыжа ў Варшаве. У хуткім часе гэтае  набажэнства стала адным з найбольш папулярных набажэнстваў Вялікага посту і на нашай зямлі. Разважанне мукаў Хрыста ў Песнях жальбы спрыяе духу пакаяння, а перадусім мае на мэце служыць нашаму навяртанню.

Натхненне

1. Песні жальбы заспявайце! * 
    Сэрцы болем напаўняйце, 
    сэрцы болем напаўняйце!
2. Вочы, плачце, як крыніцы, * 
    дайце горкіх слёз напіцца (х 2).
3. Нават сонца, месяц, зоры * 
    сумна свецяць, нібы ў горы (х 2).
4. Поўніць неба плач анёлаў, * 
    ўжо мінуў іх час вясёлы (х 2).
5. Крышацца са страху скалы, – * 
    мёртвыя з магіл паўсталі (х 2).
6. Хто жальбу сваю ўстрымае: * 
    цэлы свет нібы канае (х 2).
7. Крыж Хрыстовы і кананне *
    душы вострым болем раняць (х 2).
8. Моцай, ласкай, сілай ранаў *
    знішчы злосць сэрц нашых, Пане (х 2).
9. Вось грэх мой перад Табою, * 
    змый яго святой крывёю (х 2).
10. У бяздонні мукаў Пана *
    я з правін сваіх паўстану (х 2).
 

Першая частка

З дапамогаю Божай ласкі пачынаем разважанне над мукаю нашага Пана Езуса Хрыста. Ахвяруем яго нябеснаму Айцу на праслаўленне і хвалу Ягонай Боскай велічы, пакорна дзякуючы за вялікую і надзвычайную любоў да чалавецтва, за тое, што спаслаў свайго Сына, каб цярпеў за нас жахлівыя пакуты і прыняў смерць на крыжы. Гэтае разважанне ахвяруем таксама дзеля ўшанавання Найсвяцейшай Панны Марыі, Маці Балеснай Божага Сына, а таксама на ўшанаванне св. Юзафа і тых святых, якія асабліва пабожна ўшаноўвалі муку Хрыста.

У першай частцы будзем разважаць аб тым, што Пан Езус выцерпеў у час ад малітвы ў садзе Аліўным ажно да несправядлівага абвінавачвання перад судом. Гэтыя знявагі Пана, якія Ён за нас цярпеў, будзем ахвяраваць, просячы за святы каталіцкі Касцёл, за Святога Айца і за ўсё духавенства, а таксама за непрыяцеляў Хрыстовага крыжа і ўсіх няверных, каб Пан Бог даў ім ласку навяртання.

Гімн

1. Жаль невыносны сэрца працінае, *
    Езус мой любы келіх свой прымае; *
    кленчыць у садзе, 
    льецца пот крывавы – * 
    Бог моцы, хвалы.
2. Пана святога вучань злы цалуе, *
    войска цяжкія ланцугі рыхтуе. * 
    Без супраціву Езус іх прымае, * 
    нас выбаўляе.
3. Б’е і штурхае люд свайго Прарока, *
    злосць і нянавісць, 
    гнеў на кожным кроку. * 
    Церпіць пакорна Бога Сын адзіны, * 
    чысты, нявінны.
4. Кроў запяклася, вусны пасінелі, *
    рукі ад цяжкіх ланцугоў змярцвелі. 
    * Білі заўзята ледзь жывога Пана *
    ўсю ноч да рана.
5. Езу, мой Пане, дай дар пакаяння, * 
    дай мне, Езусе, ласку навяртання. * 
    Нашы правіны змыем мы слязамі, *
    зжалься над намі.

Плач душы над пакутамі Езуса

1. Езу, на жахлівыя мукі, * 
    нібы ягня, Ты ў путы звязаны, * 
    Езу, мілы Пане.
2. Езу, пацалункам здрадлівым * 
    быў Ты праданы, *
    Езу, мілы Пане.
3. Езу, перад смерцю ў садзе *
    з неба прасіў ад Айца злітавання, *
    Езу, мілы Пане.
4. Езу, на малітве ў самоце *
    кроў заміж поту цякла струмянямі, * 
    Езу, мілы Пане.
5. Езу, пацалунак ад Юды * 
    Ты прыняў, не спаслаў пакарання, * 
    Езу, мілы Пане.
6. Езу, ланцугамі цяжкімі * 
    Ты, нібы злодзей, быў ноччу звязаны,* 
    Езу, мілы Пане.
7. Езу, прад суддзёю, нявінны, *
    злоснымі кпінамі быў зняважаны, * 
    Езу, мілы Пане.
8. Езу, да Каяфы жаўнеры *
    вывелі ў путах Цябе на світанні, * 
    Езу, мілы Пане.
9. Езу, злой рукою па твары *
    быў моцна біты за праўды вызнанне, * 
    Езу, мілы Пане.
10. Езу,  праз ілжывых двух сведкаў * 
    падбухторшчыкам люду 
    быў Ты названы, * 
    Езу, мілы Пане.

Хвала, пашана нашаму Пану * за ўсе знявагі, за бічаванне, * за ўсе цярпенні, за ўсе мучэнні, * за наша збаўленне.

Размова душы з Маці Балеснай

1. Ах, я, Маці, ледзь трываю! * 
    Смутак сэрца мне сціскае. *
    Раніць сэрца востры меч (х 2).
2. О Марыя, што з Табою? * 
    Так прыгнечана бядою, *
    бачу я Цябе ў слязах (х 2).
3. Што пытаеш? Боль ліхая, *
    мае сілы забірае, *
    сэрца кроў мне заліла (х 2).
4. Маці Чыстая, Святая, *
    бачу, што Ты ледзь жывая, *
    боль замгліў Твой ясны твар (х 2).
5. Сын мой любы, Сын адзіны, * 
    змучаны, крывёй заліты, *
    цяжка ўжо Яго пазнаць (х 2).
6. Маці ласкі і любові, * 
    буду плакаць я з Табою, *
    боль хачу дзяліць з Табой (х 2).

Напрыканцы кожнай часткі спяваем:
Ты за нас цярпеў ад ранаў, * Езу Хрыстэ, * змілуйся над намі.

 

Другая частка

Натхненне

1. Песні жальбы заспявайце! * 
    Сэрцы болем напаўняйце, 
    сэрцы болем напаўняйце!
2. Вочы, плачце, як крыніцы, * 
    дайце горкіх слёз напіцца (х 2).
3. Нават сонца, месяц, зоры * 
    сумна свецяць, нібы ў горы (х 2).
4. Поўніць неба плач анёлаў, * 
    ўжо мінуў іх час вясёлы (х 2).
5. Крышацца са страху скалы, – * 
    мёртвыя з магіл паўсталі (х 2).
6. Хто жальбу сваю ўстрымае: * 
    цэлы свет нібы канае (х 2).
7. Крыж Хрыстовы і кананне *
    душы вострым болем раняць (х 2).
8. Моцай, ласкай, сілай ранаў *
    знішчы злосць сэрц нашых, Пане (х 2).
9. Вось грэх мой перад Табою, * 
    змый яго святой крывёю (х 2).
10. У бяздонні мукаў Пана *
    я з правін сваіх паўстану (х 2).

У другой частцы разважанняў над мукаю Пана будзем разважаць аб тым, што Пан Езус выцерпеў ад несправядлівага прысуду ажно да ўкаранавання цернем. Гэтыя раны і знявагі ахвяруем Пану, просячы супакою для нашай Айчыны, згоды паміж народамі, а для нас саміх – прабачэння грахоў, паратунку ад зямных няшчасцяў, а асабліва ад пажару, голаду, вайны і заразы.

Гімн

1. Грэшнікі, гляньце на пакуты Пана, * 
    за грэх ваш цяжкі ён прымае раны. * 
    Не лютасць катаў раніць Пана болем * 
    а злая воля.
2. Творцу сусвету 
    судзяць людзі злосна, * 
    б’юць, чыняць кпіны, 
    абражаюць моцна. * 
    Вуснаў збалелых Пан не адкрывае, * моўчкі трывае.
3. За грахі свету Езуса бічуюць, * 
    грэшным патолю на вякі рыхтуюць. * 
    Кроў, што са Збаўцы па слупе сцякае,* 
    свет выбаўляе.
4. Свету гардыня венчыць скроні ружай,* 
    на голаў Пана лёг вянок калючы. * 
    Плашч апранае Езусу для жартаў, * 
    злосная варта.
5. Езу, мой Пане, дай мне пакаянне, * 
    каб мне спазнаці шчасце навяртання.* 
    Нашы правіны змыем мы слязамі, * 
    зжалься над намі.

Плач душы над пакутамі Езуса

1. Езу, на судзе супраць праўды, * 
    хоць быў нявінны, 
    злачынцам названы, *
    Езу, мілы Пане. 
2. Езу, ад людзей жорсткіх, лютых, * 
    горкую чашу прыняў зневажанняў,*
    Езу, мілы Пане.
3. Езу, тройчы Пятром у страху * 
    нават знаёмым не быў Ты прызнаны, *
    Езу, мілы Пане.
4. Езу, у Пілата прад людам * 
    быў Ты да крыві скатаваны, * 
    Езу, мілы Пане.
5. Езу, з Цябе крыўдна і злосна * 
    Ірад смяяўся і кпілі дварчане, *
    Езу, мілы Пане.
6. Езу, ў белай вопратцы здзекі * 
    злосных жаўнераў 
    цярпеў Ты на світанні, * 
    Езу, мілы Пане.
7. Езу, да слупа прывязаны, * 
    нелітасціва Ты быў бічаваны, * 
    Езу, мілы Пане.
8. Езу, дзеля большага болю *
    цернем калючым укаранаваны, * 
    Езу, мілы Пане.
9. Езу, у плашч чырвоны жаўнерамі * 
    здзекліва й злосна быў Ты ўбраны, *
    Езу, мілы Пане.
10. Езу, кроў праліў Ты святую, * 
    невінаваты, цярпеў пакаранне, * 
    Езу, мілы Пане.

Хвала, пашана нашаму Пану * за ўсе знявагі, за бічаванне, * за ўсе цярпенні, за ўсе мучэнні, * за наша збаўленне.

Размова душы з Маці Балеснай

1. Бачу Сына без адзення, *
    кроў з плячэй цячэ струменем. *
    Пад бічамі Сыне мой (х 2).
2. Раны Сына, о Марыя, * 
    жыватворныя, святыя, *
    мне на сэрца пакладзі (х 2).
3. Бачу Сына я ў кароне, * 
    церні моцна раняць скроні, *
    кроў сцякае па грудзях (х 2).
4. Маці,  бачыш Сына ў муках, * 
    Ты не будзь адна ў пакутах, *
    дай і мне спазнаць Твой боль (х 2).
5. Як жа мне, той беднай Маці, * 
    Сынаў крыж на плечы ўзяці, *
    каб паднесці з ім хоць крок (х 2).
6. Маці ласкі і любові, * 
    буду плакаць я з Табою, * 
    боль хачу дзяліць з Табой (х 2).

Напрыканцы: 
Ты за нас цярпеў ад ранаў, * Езу Хрыстэ, * змілуйся над намі.

Трэцяя частка

 Натхненне

1. Песні жальбы заспявайце! * 
    Сэрцы болем напаўняйце, 
    сэрцы болем напаўняйце!
2. Вочы, плачце, як крыніцы, * 
    дайце горкіх слёз напіцца (х 2).
3. Нават сонца, месяц, зоры * 
    сумна свецяць, нібы ў горы (х 2).
4. Поўніць неба плач анёлаў, * 
    ўжо мінуў іх час вясёлы (х 2).
5. Крышацца са страху скалы, – * 
    мёртвыя з магіл паўсталі (х 2).
6. Хто жальбу сваю ўстрымае: * 
    цэлы свет нібы канае (х 2).
7. Крыж Хрыстовы і кананне *
    душы вострым болем раняць (х 2).
8. Моцай, ласкай, сілай ранаў *
    знішчы злосць сэрц нашых, Пане (х 2).
9. Вось грэх мой перад Табою, * 
    змый яго святой крывёю (х 2).
10. У бяздонні мукаў Пана *
    я з правін сваіх паўстану (х 2).

У гэтай апошняй частцы будзем разважаць аб тым, што Пан Езус выцерпеў ад хвіліны ўкаранавання ажно да цяжкага скону на крыжы. Усе цярпенні, кпіны і крыўды, якія Ён зносіў, ахвяруем за грэшнікаў, каб Збаўца абудзіў іхнія заблуканыя сэрцы і натхніў іх да пакаяння і жыцця ў праўдзе, а таксама будзем маліцца за ўсе душы, якія церпяць у чыстцы, каб літасцівы Езус пагасіў сваёй Крывёю агонь іхніх мукаў. Будзем таксама прасіць Пана, каб Ён і нам у хвіліну нашай смерці даў ласку скрухі за грахі і дапамог вытрываць у надзеі да апошняй хвіліны жыцця на гэтым свеце.

Гімн

1. Жорсткае сэрца, ты яшчэ не плачаш, * 
    ці ж мукаў Пана страшных 
    Ты не бачыш! *
    Езус Твой любы ўвесь крывёй сцякае,* 
    сіл больш не мае.
2. Нас палюбіўшы, сышоў Езус з неба, * 
    ды вось на плечы 
    крыж прымае з дрэва. * 
    Пад ім Ён кленчыць, 
    млее, ўстаць не можа * 
    добры наш Божа.
3. На крыж кладзецца, ціха церпіць мукі,* 
    цвік, нібы джала, прабівае рукі. *
    Па-над зямлёю 
    Збаўцу крыж узносіць, * 
    неба галосіць.
4. Дрэва святое, дай нам Збаўцы цела, * 
    каб на табе ўжо болей не вісела. * 
    Мы пахаваем Пана ў сумным гробе * 
    з плачам ў жалобе.
5. Езу, мой Пане, прагну пакаяння, * 
    прагну з надзеяй грахоў даравання. * 
    Нашы правіны змыем мы слязамі, * 
    зжалься над намі.
6. Богу навекі хай жа будзе хвала * 
    за ўсе знявагі – іх сустрэў нямала. * 
    За нас цярпеў Ён, Бога Сын адзіны, * 
    Збаўца нявінны.

Плач душы над пакутамі Езуса

1. Езу, на судзе ў Пілата * 
    з ліхадзеямі быў параўнаны, *
    Езу, мілы Пане.
2. Езу, на Галгоце жахлівай *
    Ты смерць прыняў праз укрыжаванне,*
    Езу, мілы Пане.
3. Езу, з крыжам цяжкім ішоў Ты, * 
    нёс на гару ўсіх грахоў дараванне, *
    Езу, мілы Пане.
4. Езу, да крыжа на Галгоце * 
    быў Ты прыбіты тупымі цвікамі, *
    Езу, мілы Пане.
5. Езу, са злачынцамі разам * 
    Ты прынародна быў пакараны, *
    Езу, мілы Пане.
6. Езу, кпіны, здзекі жаўнераў * 
    боль узмацнялі, пяклі Твае раны, *
    Езу, мілы Пане.
7. Езу, на крыжы літасціва * 
    злодзею ласку Ты даў паяднання, *
    Езу, мілы Пане.
8. Езу, воцат з жоўцю змяшаны * 
    далі Табе піць ў хвіліну канання, *
    Езу, мілы Пане.
9. Езу, Ты знёс маўкліва пакуты, *
    ка’ты не чулі Твайго наракання, *
    Езу, мілы Пане.
10. Езу, з крыжа вучнямі зняты, * 
    у грабніцы Ты быў пахаваны, *
    Езу, мілы Пане.

Хвала, пашана нашаму Пану * за ўсе знявагі, за бічаванне, * за ўсе цярпенні, за ўсе мучэнні, * за наша збаўленне.

Размова душы з Маці Балеснай

1. Ах, я Маці нешчасліва, * 
    ўжо цярпець не маю сілы, *
    на крыжы Мой любы Сын (х 2).
2. О Марыя, боль Твой люты, * 
    пад крыжом Твае пакуты, *
    я хачу дзяліць з Табой (х 2).
3. Вось канае Мой Сыночак, 
    закрывае Ён ўжо вочы, *
    Я канаю разам з Ім (х 2).
4. Маці, страшнаю бядою * 
    падзяліся Ты са мною, *
    дай і мне спазнаць Твой боль (х 2).
5. Ох, не чую Сына мовы, *
    Ён схіліў на грудзі голаў, *
    Я на свеце ўжо адна (х 2).
6. О, Марыя, мукі Пана, * 
    крыж, пакуты, боль і раны *
    буду ў сэрцы я насіць (х 2). 

Напрыканцы: 
Ты за нас цярпеў ад ранаў, * Езу Хрыстэ, * змілуйся над намі.

Гадзінкі аб Беззаганным Зачацці Найсвяцейшай Панны Марыі

Назва Гадзінкі паходзіць ад слова «гадзіна». У кляштарах малітвы, якія манахі адгаворваюць у пэўныя гадзіны дня, маюць назву Літургія гадзінаў (Liturgia horarum). Спевы гімнаў і малітваўГадзінак укладзеныя па прыкладзе Літургіі гадзінаў, адкуль іх асобныя назвы: Ютрань, Першая Гадзіна, Трэцяя Гадзіна, Нешпары і г. д.

Малітва Гадзінак праслаўляе таямніцу Беззаганнага Зачацця Багародзіцы, якая Божаю ласкаю была захаваная ад першароднага грэху.

Ютрань

Пачынайце, вусны нашы, 
       Маці праслаўляці,
Пачынайце гімн хвалы 
       радасна спяваці.

Будзь нам, Маці міласэрна, 
       сталай дапамогай,
Барані нас ад спакус і шатана злога.

Хвала Богу ў Тройцы вечнай 
       і Айцу, і Сыну,
І Святому Духу ўсцяж, 
       на вякі, няспынна.

Як была пашана Пану, 
       хай заўсёды будзе —
На зямлі хай праз вякі 
       Бога славяць людзі.

Гімн
Радуйся, Пані Святая, неба Валадарка,
Ты светлая, як зорка, 
       што ўзыйшла над ранкам.

Радуйся, поўная ласкі, 
       яснасць незямная,
Ратуй нас ад шатана, Маці Прасвятая.

Пані, Цябе сам Бог Моцны, 
       Творца чалавека,
Абраў за Маці Слова, 
       што жыло спрадвеку.

Слова, што свет сатварыла — 
       неба над зямлёю,
Паіла ўсё жывое чыстаю вадою.

Бог узлюбіў Цябе, Маці, 
       і ўчыніў святою,
Адамаў грэх моц страціў, 
       Пані, прад Табою.

Кантар: Выбраў Яе Бог і па-над усім узвялічыў.
Н.: І абраў Яе, быццам дом, у якім сам прабывае.
К.: Пані, пачуй малітвы нашыя.
Н.: А просьбы нашы няхай да Цябе дойдуць.

Молімся: Святая Марыя, Валадарка неба, Маці Пана нашага Езуса Хрыста і Пані свету, якая нікога не пакідаеш і нікім не пагарджаеш, глянь на нас, о наша Пані, ласкавым позіркам Тваёй міласэрнасці і выпрасі нам у свайго Сына дараванне нашых правінаў, каб мы, хто цяпер пра Тваё Беззаганнае Зачацце пабожным сэрцам разважае, маглі атрымаць у небе ўзнагароду вечнага жыцця; няхай жа нам так учыніць Табою народжаны Твой Сын, а наш Пан Езус Хрыстус, які з Айцом і Святым Духам жыве і валадарыць, у Тройцы Святой адзіны Бог на векі вечныя. Амэн.

К.: Пані, пачуй маленні нашыя.
Н.: А просьбы нашы няхай да Цябе дойдуць.
К.: Праслаўляйма Пана.
Н.: Богу хвала.
К.: А душы верных памерлых праз Божую міласэрнасць няхай адпачываюць у супакоі вечным.
Н.: Амэн.

Першая гадзіна

Будзь нам, Маці міласэрна, 
       вернай дапамогай,
Барані нас ад спакус і шатана злога.

Хвала Богу ў Тройцы вечнай 
       і Айцу, і Сыну,
І Святому Духу ўсцяж, 
       на вякі, няспынна.

Як была пашана Пану, 
       хай заўсёды будзе —
На зямлі хай праз вякі 
       Бога славяць людзі.

Гімн
Радуйся, мудрая Маці, 
       дом святы для Бога,
Які калоны здобяць велічна, прыгожа.

Пошасцям свету Ты, Пані, 
       сталася бядою,
Бо ва улонні маці ўжо была святою.

Маці зямлі, Ты ў неба 
       і у святасць Брама,
Якуба зорка ясна і анёлаў Пані.

Пострах шатана, ратуй нас 
       ад яго напасцяў,
Ты прыстань хрысціянаў 
       у горы і няшчасці.

К.: Сам Яе сатварыў у Святым Духу.
Н.: І над справамі рук сваіх Яе ўзвялічыў.
К.: Пані, пачуй маленні нашыя.
Н.: А просьбы нашыя няхай да Цябе дойдуць.

Молімся: Святая Марыя, Валадарка неба, Маці Пана нашага Езуса Хрыста і Пані свету, якая нікога не пакідаеш і нікім не пагарджаеш, глянь на нас, о наша Пані, ласкавым позіркам Тваёй міласэрнасці і выпрасі нам у свайго Сына дараванне нашых правінаў, каб мы, хто цяпер пра Тваё Беззаганнае Зачацце пабожным сэрцам разважае, маглі атрымаць у небе ўзнагароду вечнага жыцця; няхай жа нам так учыніць Табою народжаны Твой Сын, а наш Пан Езус Хрыстус, які з Айцом і Святым Духам жыве і валадарыць, у Тройцы Святой адзіны Бог на векі вечныя. Амэн.

Трэцяя гадзіна

Будзь нам, Маці міласэрна, 
       вернай дапамогай,
Барані нас ад спакус і шатана злога.

Хвала Богу ў Тройцы вечнай 
       і Айцу, і Сыну,
І Святому Духу ўсцяж, 
       на вякі, няспынна.

Як была пашана Пану, 
       хай заўсёды будзе —
На зямлі хай праз вякі 
       Бога славяць людзі.

Гімн
Радуйся, трон Саламонаў, 
       запавет Святога,
Вясёлка з фарбаў райскіх 
       Творцы Незямнога.

Ты, як агонь Майсееў, 
       Богам палымнееш,
Як посах Ааронаў, нібы цвет квітнееш.

Райская Брама замкнёна, 
       мёду пласт Самсона,
Руно, што мацавала мужнасць Гедыёна.

Сын Твой Святы і адзіны 
       Бог Праўдзівы з неба,
Цябе ўсцярог ад грэху нашай маці Евы.

Толькі Цябе, Маці Слова, 
       Бог абраў спрадвеку,
Каб Ты была нявіннай, 
       і без плямаў грэху.

К: Я жыву на вышынях.
Н.: А трон мой у слупе аблокаў.
К.: Пані, пачуй малітвы нашыя.
Н.: А просьбы нашы няхай да Цябе дойдуць.

Молімся: Святая Марыя, Валадарка неба, Маці Пана нашага Езуса Хрыста і Пані свету, якая нікога не пакідаеш і нікім не пагарджаеш, глянь на нас, о наша Пані, ласкавым позіркам Тваёй міласэрнасці і выпрасі нам у свайго Сына дараванне нашых правінаў, каб мы, хто цяпер пра Тваё Беззаганнае Зачацце пабожным сэрцам разважае, маглі атрымаць у небе ўзнагароду вечнага жыцця; няхай жа нам так учыніць Табою народжаны Твой Сын, а наш Пан Езус Хрыстус, які з Айцом і Святым Духам жыве і валадарыць, у Тройцы Святой адзіны Бог на векі вечныя. Амэн.

Шостая гадзіна

Будзь нам, Маці міласэрна, 
       вернай дапамогай,
Барані нас ад спакус і шатана злога.

Хвала Богу ў Тройцы вечнай 
       і Айцу, і Сыну,
І Святому Духу ўсцяж, 
       на вякі, няспынна.

Як была пашана Пану, 
       хай заўсёды будзе —
На зямлі хай праз вякі 
       Бога славяць людзі.

Гімн
Радуйся, Тройцы сяліба, 
       Божая Святыня,
Палац святы анёлаў, 
       дзеваў Храм нявінных.

Ты суцяшэнне журботных, 
       сад удзячных думак,
Ты сіла цярплівых, чысціні дарунак.

О Благаслаўлёная Пані, 
       Ты зямля святая,
Нявіннасці і цнотаў, дар таемны маеш.

Быццам святы горад Божы, 
       ці на Усходзе брама,
Любоўю, ласкай светлай 
       ззяеш, Беззаганна!

К.: Быццам лілея паміж церняў.
Н.: Так і мая ўмілаваная паміж дачок Адама.
К.: Пані, пачуй малітвы нашыя.
Н.: А просьбы нашы няхай да Цябе дойдуць.

Молімся: Святая Марыя, Валадарка неба, Маці Пана нашага Езуса Хрыста і Пані свету, якая нікога не пакідаеш і нікім не пагарджаеш, глянь на нас, о наша Пані, ласкавым позіркам Тваёй міласэрнасці і выпрасі нам у свайго Сына дараванне нашых правінаў, каб мы, хто цяпер пра Тваё Беззаганнае Зачацце пабожным сэрцам разважае, маглі атрымаць у небе ўзнагароду вечнага жыцця; няхай жа нам так учыніць Табою народжаны Твой Сын, а наш Пан Езус Хрыстус, які з Айцом і Святым Духам жыве і валадарыць, у Тройцы Святой адзіны Бог на векі вечныя. Амэн.

Дзевятая гадзіна

Будзь нам, Маці міласэрна, 
       вернай дапамогай,
Барані нас ад спакус і шатана злога.

Хвала Богу ў Тройцы вечнай 
       і Айцу, і Сыну,
І Святому Духу ўсцяж, 
       на вякі, няспынна.

Як была пашана Пану, 
       хай заўсёды будзе —
На зямлі хай праз вякі 
       Бога славяць людзі.

Гімн
Радуйся, прыстань уцёкшых, 
       вежа справядлівых,
Прыгожая, як хорам, 
       узведзены Давідам.

Ты пры зачацці любоўю, 
       ласкай палымнела,
Ад яснасці той пекла ў немачы самлела.

Мужная Панна Святая, 
       як сама Юдыта,
Што люд свой ратавала, 
       у палон здабыты.

Хлебам карміў увесь Егіпет, 
       слаўны сын Рахэлі,
Марыі Сын ад смерці збавіў 
       свет збуцвелы.

К.: Якая ж Ты прыгожая, наша Пані.
Н.: А правіны грэху першароднага 
ў Табе не знайшлося.
К.: Пані, пачуй малітвы нашыя.
Н.: А просьбы нашы няхай да Цябе дойдуць.

Молімся: Святая Марыя, Валадарка неба, Маці Пана нашага Езуса Хрыста і Пані свету, якая нікога не пакідаеш і нікім не пагарджаеш, глянь на нас, о наша Пані, ласкавым позіркам Тваёй міласэрнасці і выпрасі нам у свайго Сына дараванне нашых правінаў, каб мы, хто цяпер пра Тваё Беззаганнае Зачацце пабожным сэрцам разважае, маглі атрымаць у небе ўзнагароду вечнага жыцця; няхай жа нам так учыніць Табою народжаны Твой Сын, а наш Пан Езус Хрыстус, які з Айцом і Святым Духам жыве і валадарыць, у Тройцы Святой адзіны Бог на векі вечныя. Амэн.

Нешпары

Будзь нам, Маці міласэрна, 
       вернай дапамогай,
Барані нас ад спакус і шатана злога.

Хвала Богу ў Тройцы вечнай 
       і Айцу, і Сыну,
І Святому Духу ўсцяж, 
       на вякі, няспынна.

Як была пашана Пану, 
       хай заўсёды будзе —
На зямлі хай праз вякі 
       Бога славяць людзі.

Гімн
Радуйся, о яснасць свету, 
       верных дапамога,
Ты кроў дала і цела Сыну Пана Бога.

Каб чалавек у даліне грэху не загінуў,
А годным стаўся неба, 
       хвалы херубімаў.

Промнямі сонца святога, 
       зіхаціць Марыя —
Зачатая без грэху чыстая лілея.

Цвет паміж церняў — Марыя 
       мужна змея топча,
Як месяц ясны ў поўні, 
       цемру губіць ноччу.

К.: Я ўчыніла, каб на небе няспынна ўзыходзіла сонца.
Н.: І быццам імгліца ўсю зямлю агарнула.
К.: Пані, пачуй малітвы нашыя.
Н.: А просьбы нашы няхай да Цябе дойдуць.

Молімся: Святая Марыя, Валадарка неба, Маці Пана нашага Езуса Хрыста і Пані свету, якая нікога не пакідаеш і нікім не пагарджаеш, глянь на нас, о наша Пані, ласкавым позіркам Тваёй міласэрнасці і выпрасі нам у свайго Сына дараванне нашых правінаў, каб мы, хто цяпер пра Тваё Беззаганнае Зачацце пабожным сэрцам разважае, маглі атрымаць у небе ўзнагароду вечнага жыцця; няхай жа нам так учыніць Табою народжаны Твой Сын, а наш Пан Езус Хрыстус, які з Айцом і Святым Духам жыве і валадарыць, у Тройцы Святой адзіны Бог на векі вечныя. Амэн.

Напрыканцы дня

Хай жа дасць нам Сын Твой любы ласку навяртання,
Хай даруе нам грахі, не спашле карання.

Будзь нам, Маці міласэрна, 
       вернай дапамогай,
Барані нас ад спакус і шатана злога.

Хвала Богу ў Тройцы вечнай 
       і Айцу, і Сыну,
І Святому Духу ўсцяж, 
       на вякі, няспынна.

Як была пашана Пану, 
       хай заўсёды будзе —
На зямлі хай праз вякі 
       Бога славяць людзі.

Гімн
Радуйся, о Маці цноты, 
       святасці дзявочай,
Напоўненая ласкай у вянку святочным.

О Беззаганная Маці, чысціня анёлаў,
Стаіш ля трона Бога — галава ў кароне.

Ласку для нас спарадзіла, 
       ветлая, Прачыста.
Ты грэшнікаў надзея, 
       тых, што тонуць, прыстань.

Райская Брама для слабых, 
       грэшных абарона,
Вядзі нас на сустрэчу з Богам на Сіёне.

К.: Тваё імя, о Марыя, як алей духмяны.
Н.: А Твае слугі моцна Цябе ўзлюбілі.
К.: Пані, пачуй малітвы нашыя.
Н.: А просьбы нашы няхай да Цябе дойдуць.

Молімся: Святая Марыя, Валадарка неба, Маці Пана нашага Езуса Хрыста і Пані свету, якая нікога не пакідаеш і нікім не пагарджаеш, глянь на нас, о наша Пані, ласкавым позіркам Тваёй міласэрнасці і выпрасі нам у свайго Сына дараванне нашых правінаў, каб мы, хто цяпер пра Тваё Беззаганнае Зачацце пабожным сэрцам разважае, маглі атрымаць у небе ўзнагароду вечнага жыцця; няхай жа нам так учыніць Табою народжаны Твой Сын, а наш Пан Езус Хрыстус, які з Айцом і Святым Духам жыве і валадарыць, у Тройцы Святой адзіны Бог на векі вечныя. Амэн.

Ахвяраванне Гадзінак

Пані, прымі спеў Гадзінак, 
       што Табе мы ўзносім,
З паклонам і пакорай дапамогі просім.

Шляхам збаўленным, о Маці, 
       нас вядзі да раю.
Прыбудзь да ложа смерці, 
       не пакінь пры сконе.

Антыфона
О Квеце Ружы, што грэх першародны амінула, і злога ўчынку бруду не спазнала.

К.: Пры сваім Зачацці, о Пані, Ты была Беззаганнай.
Н.: Маліся за нас да Бога Айца, бо Ягонага Ты нарадзіла Сына.

Молімся: Божа, Ты праз Беззаганнае Зачацце Найсвяцейшай Панны падрыхтаваў свайму Сыну годнае прабыванне ў нявінным улонні, і праз заслугі будучай смерці Хрыста захаваў Яе ад усялякай правіны. Дазволь нам праз Яе заступніцтва дайсці да Цябе без грэху. Праз Пана нашага Езуса Хрыста, які з Табою жыве і валадарыць у еднасці Духа Святога, Бог праз усе вякі вечныя. 
Н.: Амэн.

Святы ружанец

Пра святы ружанец

У старажытнасці быў цудоўны звычай ахвяраваць асабліва годным людзям вянкі, сплеценыя з ружаў. Хрысціяне ўшаноўвалі Хрыста, Маці Божую і святых, складаючы ружавыя вянкі на іхніх алтарах.

Ружанец (на лаціне rosarium – ружавы кветнік) – пэўны спосаб малітвы, паслядоўнасць якой адлічваецца, нібы па пялёстках ружы, што разгортваецца ярусамі па пяць малітваў у кожным. Малітва гэта спалучаная з роздумам пра падзеі з жыцця Езуса і Панны Марыі, што ўтвараюць чатыры часткі Ружанца – радасныя таямніцы, балесныя таямніцы, таямніцы святла і хвалебныя. Сам спосаб малітвы прыйшоў з хрысціянскага Усходу, дзе з’явіўся прыкладна ў ІІІ ст. Кожная асобная малітва (паклон) адзначалася вузельчыкам на вяроўцы. Праз пяць стагоддзяў ён прыйшоў на Захад, дзе атрымаў лацінскую назву Pater noster (ад першых словаў малітвы Ойча наш..., адсюль і беларускія «пацеркі»). Сучасная форма Ружанца ўсталявалася ў 1470-х гадах праз дамініканцаў Алана Рупскага і Якуба Шпрэнгера і была ўпершыню надрукаваная

ў 1481 г. У 1520 г. яна была асвечаная папам Львом Х і названая Ружанцам Найсвяцейшай Панны Марыі.

Актуальнасць ружанцовай малітвы для нашага часу падкрэсліў Папа Ян Павел ІІ. У 2002 г. Святы Айцец выдаў апостальскі ліст Rosarium Virginis Mariae, у якім Святы Айцец запрасіў нанова адкрыць Ружанец і дапоўніў яго новаю часткаю – таямніцамі святла, звязанымі з публічнаю дзейнасцю Хрыста.

Ружанец – «вянок ружаў» – нібы з найлепшых кветак сплецены з найдаражэйшых малітваў: Ойча наш..., якой навучыў нас сам Пан Езус, і Вітай, Марыя..., якою віталі Марыю Божы пасланец Арханёл Габрыэль і святая Альжбета, маці Яна Хрысціцеля.

Ружанцам завецца таксама нізка асаблівым чынам змацаваных пацерак (драўляных, касцяных, бурштынавых і інш.), дзе кожнаю пацеркаю адзначаецца асобная малітва.

Як маліцца на ружанцы

Звычайна Ружанец пачынаецца ўступнымі малітвамі, якія гаворацца на крыжыку і пяці першых пацерках. Перажагнаўшыся крыжыкам і кажучы У імя Айца..., гавораць, трымаючы крыжык, Веру ў Бога Айца..., затым на першай пацерцы – Ойча наш..., на трох наступных – тры Вітай, Марыя... і на пятай – Хвала Айцу....

Ружанец складаецца з чатырох частак, у кожную з якіх уваходзяць пяць таямніцаў. У кожнай таямніцы на першай асобнай пацерцы гаворыцца Ойча наш..., на дзесяці змацаваных разам пацерках – дзесяць Вітай, Марыя..., і на наступнай, асобнай пацерцы – Хвала Айцу і Сыну..., «О Марыя, без граху першароднага зачатая, маліся за нас, хто ў Цябе паратунку шукае!» На гэтай жа пацерцы гаворыцца і малітва, якую прасіла дадаваць пасля кожнае дзесяткі Маці Божая падчас свайго аб’яўлення ў Фаціме: «О мой Езу, прабач нам грахі нашыя, захавай нас ад агню пякельнага, правядзі ўсе душы на неба і дапамажы асабліва тым, каму найбольш патрэбна Твая міласэрнасць». На гэтай жа пацерцы гаворыцца таксама і Ойча наш... наступнай таямніцы.

Пацеркі, якімі мы карыстаемся, маюць пяць дзесяткаў, падзеленых між сабою пяццю асобнымі пацеркамі. Таму, перабраўшы іх адзін раз, мы можам памаліцца толькі адну частку Ружанца. Каб згаварыць яго цалкам, неабходна перабраць пацеркі чатыры разы.

На пачатку кожнай таямніцы звычайна прыгадваем яе сэнс і разважаем аб жыцці Езуса і Марыі. Разважанне – найважнейшы момант Ружанца. Без яго Ружанец падобны да цела без душы. Адгаворваючы Ружанец без разважанняў, мы часта ператвараем яго ў паўтарэнне слоў. Ёсць розныя спосабы разважання таямніцаў Ружанца. Напачатку можна разважаць, дапамагаючы сабе тэкстамі, пададзенымі ніжэй. Пазней, глыбей асягнуўшы Ружанец, можна абапірацца на ўласныя рэфлексіі.

Гэты вянок малітваў і разважанняў называюць яшчэ «малым Евангеллем», «лесвіцаю ў неба».

1 «Веру ў Бога...» 1 раз
2 «Ойча наш...» 1 раз
3 «Вітай, Марыя...» 3 разы
4 «Хвала Айцу...» 1 раз
4 Назваць таямніцу Ружанца
4 «Ойча наш...» 1 раз
5 «Вітай, Марыя...» 10 разоў
6 «Хвала Айцу...» 1 раз
6 Назваць наступную таямніцу Ружанца
6 «Ойча наш...» 1 раз
7 «Вітай, Марыя...» 10 разоў

 

Таямніцы Святога ружанца

Радасныя таямніцы

Звеставанне Найсвяцейшай Панне Марыі

Адведзіны Паннай Марыяй святой Альжбеты

Нараджэнне Збаўцы нашага Езуса Хрыста

Ахвяраванне Хрыста ў святыні

Езуса знаходзяць у Ерузалемскай святыні

Таямніцы святла

Хрост Пана Езуса ў Ярдане

Езус аб'яўляе сябе на вяселлі ў Кане

Абвяшчэнне Валадарства Божага і заклік да навяртання

Перамяненне Пана на гары Табор

Устанаўленне Эўхарыстыі

Балесныя таямніцы

Малітва Езуса Хрыста ў Садзе Аліўным

Бічаванне Езуса

Укаранаванне Езуса цернем

Езус нясе крыж на гару Кальварыйскую

Укрыжаванне і смерць Езуса на крыжы

Хвалебныя таямніцы

Змёртвыхпаўстанне Хрыста

Унебаўшэсце Хрыста

Спасланне Духа Святога

Унебаўзяцце Найсвяцейшай Панны Марыі

Укаранаванне Найсвяцейшай Панны Марыі

 

Радасныя таямніцы

(молімся ў панядзелак і суботу)

І. Звеставанне Найсвяцейшай Панне Марыі
(пар. Лк 1, 26–38)

 

26.  У шосты ж месяц пасланы быў Анёл Габрыэль ад Бога ў места Галілейскае,  

      называнае Назарэт,

27.  да Панны, заручанай з мужам імем Юзаф, з дому Давідавага; імя ж Панны –  

      Марыя. 

28.  Анёл, увайшоўшы да яе, сказаў: вітай, поўная ласкі! Пан з Табою.

30.  І сказаў ёй Анёл: не бойся, Марыя; бо Ты знайшла ласку ў Бога.

31.  І вось зачнеш ва ўлонні і народзіш Сына і дасі Яму імя: Езус.

38.  І сказала Марыя: вось я – Слуга Пана; няхай мне станецца паводле твайго

      слова.

ІІ. Адведзіны Паннай Марыяй святой Альжбеты
(пар. Лк 1, 39–47)

39.  Устаўшы ж, Марыя ў тыя дні хутка пайшла ў горную краіну, у места Юдзіна.

40.  І ўвайшла ў дом Захарыі і прывітала Альжбету.

41.  ...напоўнілася Альжбета Духам Святым.

42.  І загаласіла моцным голасам і сказала: благаславёная Ты між жанчынамі і

      благаславёны плод улоння Твайго.

46.  І сказала Марыя: узвялічвае душа мая Пана;

47.  і ўзрадаваўся дух мой у Богу, Збаўцы маім.

ІІІ. Нараджэнне Збаўцы нашага Езуса Хрыста

(пар. Лк 2, 6–11)

6.   Калі ж яны былі там, надышоў час нарадзіць Ёй;

7.   і нарадзіла Сына свайго... , і палажыла Яго ў жолабе, бо не было ім месца ў

     гасподзе.

8.   У той мясціне былі на полі пастухі, што вартавалі ўначы ля статку свайго.

9.   І вось з’явіўся ім Анёл Пана, і слава Пана асвяціла іх; і ўбаяліся страхам вялікім.

10.  І сказаў ім Анёл: не бойцеся! бо вось абвяшчаю вам вялікую радасць, што

      будзе ўсім людзям:

11.  бо цяпер нарадзіўся вам у месце Давідавым Збаўца, які ёсць Хрыстус Пан.

ІV. Ахвяраванне Хрыста ў святыні
(пар. Лк 2, 22– 35)

22.  А калі скончыліся дні ачышчэння іх па закону Майсееваму, прынеслі Яго ў

      Ерузалем, каб прадставіць перад Панам.

25.  І вось быў у Ерузалеме чалавек, іменем Сімяон.

28.  ...ён узяў Яго на рукі, благаславіў Бога і сказаў:

30.  ...бачылі вочы мае збаўленне Тваё,

31.  якое Ты прыгатаваў перад абліччам усіх народаў...

34.  ...і сказаў Марыі, Маці Яго: вось ляжыць Гэты на ўпадак і паўстанне многіх у  

      Ізраэлi і на знак, якому працівіцца будуць,

35.  і табе самой меч пранікне ў душу, – каб выявіліся памышленні многіх сэрцаў.

V. Езуса знаходзяць у Ерузалемскай святыні
(пар. Лк 2, 43–49)

43.  ...застаўся хлопчык Езус у Ерузалеме; і не заўважылі таго Юзаф ды Маці Яго.

46.  Праз тры дні знайшлі Яго ў святыні, дзе сядзеў сярод вучыцеляў, слухаючы іх і  

      пытаючыся ў іх.

48.  ...і Маці Яго сказала Яму: Дзіця! што Ты зрабіў з намі? Вось бацька Твой і я з

      вялікаю тугою шукалі Цябе.

49.  Ён сказаў ім: нашто было вам шукаць Мяне? Ці ж вы не ведалі, што Мне трэба  

      быць у тым, што належыць Айцу Майму?

  

Таямніцы святла

(молімся ў чацвер)

І. Хрост Пана Езуса ў Ярдане
(пар. Мц 3, 16-17)

16.  Калі Езус ахрысціўся, адразу ж выйшаў з вады, і раскрыліся Яму нябёсы, і  

      ўбачыў Духа Божага, які спускаўся, як голуб, і сыходзіў на Яго.

17.  І голас з неба прамовіў: Гэта Сын Мой умілаваны, якога Я ўпадабаў.

ІІ. Езус аб’яўляе сябе на вяселлі ў Кане
(пар. Ян 2, 1. 3. 7-9. 11)

2.   У Кане Галілейскай было вяселле...

3.   І, калі не хапіла віна, Маці Езуса сказала Яму: не маюць віна.

7.   Езус сказаў: напоўніце збаны вадою...

8.   І кажа ім: цяпер зачарпніце і занясіце кіраўніку вяселля...

9.   ...Кіраўнік вяселля пакаштаваў ваду, што стала віном ...

11.  Такі пачатак цудаў учыніў Езус у Кане Галілейскай.

ІІІ. Абвяшчэнне Валадарства Божага і заклік да навяртання
(пар. Мк 1, 14-15; Лк 8, 1)

Мк 1

14.  Пасля таго, як выдалі Яна, прыйшоў Езус у Галілею, прапаведуючы Евангелле  

      Божае

15.  і кажучы, што настаў час і наблізілася Валадарства Божае: кайцеся і верце ў  

      Евангелле.

Лк 8

1.  Пасля праходзіў Ён па гарадах і вёсках, прапаведуючы і абвяшчаючы Добрую  

    Навіну аб Валадарстве Божым.

ІV. Перамяненне Пана на гары Табор
(пар. Лк 9, 28-29. 35)

28.  Езус узяў з сабою Пятра, Яна і Якуба і ўзышоў на гару памаліцца.

29.  І калі Ён маліўся, выгляд твару Яго перамяніўся, і вопратка Ягоная стала  

      бліскуча-белай...

35.  А з воблака пачуўся голас, які казаў: Гэта Сын Мой выбраны; Яго слухайце.

V. Устанаўленне Эўхарыстыі
(пар. Мц 26, 26-28)

26.  І, калі яны елі, Езус узяў хлеб, благаславіў, ламаў і даваў вучням, кажучы:

      бярыце і ешце; гэта Цела Маё.

27.  Потым узяў келіх і, падзякаваўшы, даў ім, кажучы: піце з яго ўсе;

28.  бо гэта Кроў Мая новага запавету, якая будзе праліта за многіх дзеля

      адпушчэння грахоў.

 

Балесныя таямніцы

(молімся ў аўторак і пятніцу)

І. Малітва Езуса Хрыста ў Садзе Аліўным
(пар. Лк 22, 41–45)

41.  Езус адышоў ад іх, як кінуць камень, і, укленчыўшы, маліўся.

42.  Кажучы: Ойча, калі Твая воля, пранясі келіх гэты міма Мяне, аднак не Мая воля,  

      але Твая няхай станецца.

43.  З’явіўся ж Яму Анёл з неба, умацоўваючы Яго.

44.  Ён, будучы ў агоніі, яшчэ пільней маліўся, і быў пот Яго, як кроплі крыві,  

      сцякаючай на зямлю.

45.  І, калі падняўся ад малітвы, Ён прыйшоў да вучняў сваіх і знайшоў іх спячымі ад

      смутку...

ІІ. Бічаванне Езуса
(пар. Мц 27, 22–25, Ян 19,1)

Мц 27

22.  Пілат кажа ім: што ж зрабіць мне з Езусам, называным Хрыстом? Кажуць яму

      ўсе: няхай будзе распяты!...

24.  Пілат, бачачы, што нішто не памагае, а абурэнне павялічваецца, узяў вады і

      ўмыў рукі перад народам і сказаў: невінаваты я ў крыві Праведніка гэтага; вы

      глядзіце.

25.  Адказваючы, увесь народ сказаў: кроў Яго на нас і на дзецях нашых!

Ян 19

1.   Тады Пілат узяў Езуса і бічаваў Яго.

ІІІ. Укаранаванне Езуса цернем
(пар. Мц 27, 27–30)

27.  Тады жаўнеры начальніка, узяўшы Езуса да прэторыі, сабралі на Яго цэлую

      роту.

28.  І, раздзеўшы Яго, апранулі Яму чырвоны плашч;

29.  і, сплёўшы вянок з цярніны, уздзелі Яму на галаву і далі Яму ў правую руку

      трысціну; і, становячыся перад Ім на калені, насміхаліся з Яго, кажучы:    

      радуйся, Цар Юдэйскі!

30.  І плявалі на Яго і, узяўшы трысціну, білі Яго па галаве.

ІV. Езус нясе крыж на гару Кальварыйскую
(пар. Мц 27, 31; Лк 23, 26–28)

Мц 27

31.  І, калі насмяяліся з Яго, знялі з Яго чырвоны плашч, і адзелі Яго ў адзежы Ягоныя, і павялі Яго на ўкрыжаванне.

Лк 23

26.  І, як вялі Яго, то, узяўшы нейкага Сымона Кірынэйца, што ішоў з поля, усклалі

      на яго крыж, каб нёс за Езусам.

27.  І ішло за Ім вялікае мноства народу і жанчынаў, якія плакалі і галасілі па Ім.

28.  Езус жа, звярнуўшыся да іх, сказаў: дочкі Ерузалемскія! Не плачце па Мне, але

      плачце па сабе і па дзецях вашых...

V. Укрыжаванне і смерць Езуса на крыжы
(пар. Ян 19, 17–27; Лк 23, 44–46)

Ян 19

17.  І, несучы крыж свой, Ён выйшаў на ўрочышча Чарапоў, што па-жыдоўску

      называецца Галгофа,

18.  дзе і ўкрыжавалі Яго і з Ім двух другіх паабапал Яго, а ў сярэдзіне Езуса.

25.  Стаялі ж ля крыжа Езусавага Маці Яго і сястра Маці Яго, Марыя Кляопава, і

      Марыя Магдалена.

26.  Езус жа, угледзеўшы Маці і вучня, што стаяў побач і якога любіў, кажа Маці

      сваёй: Жанчына, вось сын Твой!

27.  Пасля кажа вучню: вось Маці твая!... І з таго часу вучань гэты ўзяў Яе да сябе.

Лк 23

44.  Было ж каля шостае гадзіны дня, і сталася цемра па ўсёй зямлі да гадзіны

      дзевятае.

45.  І згасла сонца, і заслона ў святыні разарвалася пасярэдзіне.

46.  Езус, загаласіўшы моцным голасам, сказаў: Ойча, у рукі Твае аддаю дух Мой. І,

      сказаўшы гэтае, аддаў дух.

 

Хвалебныя таямніцы

(молімся ў сераду і нядзелю)

І. Змёртвыхпаўстанне Хрыста
(пар. Мц 28, 1–9)

1.   ...У час світання першага дня тыдня, прыйшла Марыя Магдалена і другая Марыя

     паглядзець магілу.

2.   І вось страшна затрэслася зямля, бо Анёл Пана, зышоўшы з неба, прыступіўшы,

      адваліў камень ад дзвярэй магілы і сеў на ім.

3.   Выгляд яго быў, як бліскавіца, і вопратка яго белая, як снег.

4.   І ад страху прад ім задрыжэлі вартаўнікі і зрабіліся як нежывыя.

5.   Анёл жа, адказваючы жанчынам, сказаў: не бойцеся; бо ведаю, што вы шукаеце

     Езуса распятага.

6.   Яго няма тут: Ён уваскрос, як і сказаў.

9.   Калі ж яны ішлі апавясціць вучняў Яго, дык вось Езус спаткаў іх і сказаў:

     радуйцеся! І яны, прыступіўшыся, абнялі ногі Яго і пакланіліся Яму.

ІІ. Унебаўшэсце Хрыста
(пар. Лк 24, 46–51; Дз 1, 10–11)

Лк 24

46.  І Хрыстус сказаў ім [апосталам]: так напісана і так належала цярпець Хрысту і

      ўваскрэснуць на трэці дзень,

47.  і прапаведвацца ў імя Яго пакаянню ды адпушчэнню грахоў ва ўсіх народах,

      пачынаючы ад Ерузалема,

48.  вы ж сведкі гэтага.

50.  І вывеў іх з места да Віфаніі і, падняўшы рукі свае, благаславіў іх.

51.  Як благаславіў іх, стаў аддаляцца ад іх і ўзносіцца на неба.

Дз 1

10.  Калі ж яны пільна ўглядаліся ў неба, як Ён адыходзіў, вось двое мужоў сталі

      перад імі ў белых вопратках,

11.  дый сказалі яны: мужы Галілейскія! Чаго стаіцё, узіраючыся на неба? Гэты Езус,

      узяты ад вас на неба, прыйдзе гэтаксама, як бачылі вы Яго ўзыходзячым на

      неба.

ІІІ. Спасланне Духа Святога
(пар. Лк 24, 49; Дз 2, 1–4)

Лк 24

49.  ... вы ж заставайцеся ў месце Ерузалеме, пакуль не адзенецеся сілаю звыш.

Дз 2

1.   І як канчаўся дзень Пяцідзесятніцы, усе былі аднадушна разам.

2.   І знячэўку пачуўся гук з неба, быццам ад наляцеўшага буйнага ветру, ды

     напоўніў увесь дом, дзе яны сядзелі.

3.   І паказаліся ім падзеленыя языкі, быццам агнявыя, ды паселі на кожным з іх.

4.   І напоўніліся ўсе Духам Святым ды пачалі гутарыць іншымі языкамі, так, як Дух

     Святы даў ім прамаўляць.

ІV. Унебаўзяцце Найсвяцейшай Панны Марыі
(пар. Лк 1, 46–52)

46.  І сказала Марыя: узвялічвае душа мая Пана;

47.  І ўзрадаваўся дух мой у Богу Збаўцу маім,

48.  бо ўзглянуў Ён на пакору слугі сваёй, і адгэтуль шчасліваю назавуць мяне ўсе

      роды,

49.  бо вялікае ўчыніў мне Усемагутны; і святое імя Яго...

51.  Учыніў сілу рукою сваёю; рассеяў пышных думкамі сэрца іх,

52.  адабраў у моцных пасады, узвысіў прыніжаных.

V. Укаранаванне Найсвяцейшай Панны Марыі
(пар. Ап 12, 1.10)

1.   І знак вялікі паказаўся на небе: жанчына, апранутая ў сонца, і месяц пад нагамі

      ў яе, і на галаве яе вянок з дванаццаці зорак....

10.  І пачуў я голас вялікі, мовячы ў небе: цяпер настала збавенне і сіла, і

      валадарства Бога нашага, ды ўлада Хрыста Ягонага: бо скінуты той, хто

      абвінавачвае братоў нашых, што дзень і ноч вінаваціў іх фальшыва перад Богам

      нашым.

Крыжовы шлях

 У Ерузалеме ўзнікла традыцыя хадзіць па месцах, звязаных з Мукай Езуса Хрыста, нашага Збаўцы, каб разважаць Яго крыжовы шлях на Кальварыю. З часам ва ўсім Касцёле пачалі ўзводзіць т. зв. «стацыі» мукі Пана. Вернікі, асабліва ў перыяд Вялікага посту, ідуць ад стацыі да стацыі, разважаючы цярпенні Збавіцеля.

Уступная малітва

О Езу, укрыжаваны мой Збавіцель! Разважаючы пра Твае мукі, хачу перапрасіць Цябе за грахі, падзякаваць за вялікую любоў Тваю і выпрасіць ласку вытрываласці ў добрым.
Ахвярую Табе гэтыя малітвы і разважанні таксама за душы чыстцовыя; асабліва за душу N.(называецца імя).

Дапамажы мне, Езу мілы, у гэтай святой практыцы.

Стацыя 1

Езус асуджаны на смерць

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Марка (пар. Мк 15, 15):
«Тады Пілат, хочучы дагадзіць народу, звольніў ім Вараву, а Езуса аддаў пасля бічавання распяць».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 2

Езус бярэ крыж

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Яна (пар. Ян 19, 17):
«І, несучы крыж свой, Ён выйшаў на ўрочышча Чарапоў, што па-жыдоўску называецца Галгофа».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 3

Езус падае першы раз

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Яна (пар. Ян 12, 24):
«Калі пшанічнае зерне, упаўшы на зямлю, не памрэ, то застанецца само, а калі памрэ, дасць багаты плён».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 4

Езус сустракае сваю Маці

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Лукі (пар. Лк 2, 34-35):
«І благаславіў іх Сімяон і сказаў Марыі, Маці Яго: Ён вось пастаўлены на падзенне і на паўстанне многіх у Ізраэлі і на знак, якому працівіцца будуць, а Тваю душу праб’е меч».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 5

Сымон Кірынэец дапамагае Езусу несці крыж

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св.Марка (пар. Мк 15, 21):
«І прымусілі нейкага Сымона Кірынэйца, бацьку Аляксандра і Руфа, які ішоў з поля, каб нёс крыж Ягоны».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 6

Вераніка выцірае твар Езуса

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Кнігі прарока Ісаі (пар. Іс 53, 2-3):
«Не меў ён ані прывабнасці, ані бляску, каб на Яго паглядзець, ані выгляду, каб нам падабацца.
Пагарджаны і адпіхнуты людзьмі (...), як хтосьці, перад кім закрываюць твар».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 7

Езус падае другі раз

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Марка (пар. Мк 14, 34-35):
«І (Езус) сказаў ім: сумная душа Мая аж да смерці (...).
І, адышоўшыся трохі, упаў на зямлю і маліўся, каб, калі магчыма, абмінула Яго гэтая часіна».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 8

Езус суцяшае ерузалемскіх жанчын

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Лукі (пар. Лк 23, 27-28):
«Ішло за Ім вялікае мноства народу і жанчын, якія плакалі і галасілі па Ім. Езус жа, звярнуўшыся да іх, сказаў: дочкі ерузалемскія! не плачце па Мне, але плачце па сабе і па дзецях вашых».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 9

Езус падае трэці раз

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Мацвея (пар. Мц 11, 28-30):

«Прыйдзіце да мяне ўсе працуючыя і абцяжараныя, і Я супакою вас. Вазьміце ярмо Маё на сябе і навучыцеся ад Мяне: бо Я ціхі і лагоднага сэрца, і знойдзеце супакой душам вашым. Бо ярмо Маё любае і цяжар Мой лёгкі».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 10

З Езуса здзіраюць адзенне

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Марка (пар. Мк 15, 24):
«Падзялілі вопратку Ягоную, кідаючы жэрабя, каму што ўзяць».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 11

Укрыжаванне Езуса

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Марка (пар. Мк 15, 25-26):
«Была трэцяя гадзіна, і распялі Яго на крыжы. І быў надпіс віны Ягонае напісаны: Цар Юдэйскі. І з Ім разам распялі двух разбойнікаў, аднаго з правага, а другога з левага боку Яго».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 12

Езус памірае на крыжы

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Марка (пар. Мк 15, 33-39):

«А шостай гадзіне настала цемра па ўсёй зямлі ажно да дзевятае гадзіны. І а дзевятай гадзіне загаласіў Езус моцным голасам: Элоі, Элоі! ламма сабахтані! што азначае: Божа Мой, Божа Мой! на што Ты Мяне пакінуў? (...) Адзін жа, пабегшы і набраўшы ў губку воцату ды насадзіўшы яе на трысціну, паіў Яго. (...) Езус жа, загаласіўшы моцным голасам, сканаў. (...) Сотнік жа, што стаяў насупраць Яго, сказаў: сапраўды, чалавек гэты быў Сын Божы».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 13

Езуса здымаюць з крыжа

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Яна 1(пар. Ян 9, 25, 32-34, 38):
«Стаялі ж ля крыжа Езусавага Маці Яго і сястра Маці Яго Марыя Клеафасава і Марыя Магдалена (...).
І вось прыйшлі жаўнеры (...), падышлі да Езуса і ўбачылі, што Ён памёр ужо (...), адзін з жаўнераў прабіў Яму бок дзідаю, і ўраз жа пацякла кроў і вада (...) Потым Юзаф з Арыматэі (...) папрасіў Пілата, каб зняць цела Езуса».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Стацыя 14

Езуса кладуць у грабніцу

С.: Кланяемся Табе, Пане Езу Хрыстэ!
Усе: Бо праз Крыж і Муку сваю свет адкупіў Ты!

З Евангелля паводле св. Марка (пар. Мк 15, 45-47):

«І (Пілат), даведаўшыся ад сотніка, аддаў цела Юзафу. І купіўшы палатно ды зняўшы Яго, абвіў палатном і палажыў Яго ў магілу, што была высечана ў скале, ды прываліў камень да дзвярэй магілы. А Марыя Магдалена і Марыя, маці Юзафа, глядзелі, дзе Яго палажылі».

Ойча наш... Вітай, Марыя... Хвала Айцу...

Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Перад алтаром:
Які за нас цярпеў ад ранаў, Езу Хрыстэ, змілуйся над намі!
Маці Божая Балесная, заступіся за нас!

Няхай будзе пахвалёны Найсвяцейшы Сакрамэнт –
Праўдзівае Цела і Кроў Пана нашага Езуса Хрыста.

Малітва на заканчэнне Крыжовага шляху

Езу Хрыстэ, наш Збавіцель! На гэтым Крыжовым шляху спазналі мы Тваю бязмежную міласэрнасць і любоў да нас, грэшных. Ты мукамі сваімі і смерцю крыжоваю заплаціў Айцу Нябеснаму за нашыя правіны і заслужыў нам вечнае шчасце.

Прымі ж, Божа, у падзяку хоць гэты шлях, які мы прайшлі разам з Табою. Дай, каб пачуццё, што ўзрушыла нас падчас гэтага шляху, трывала ў нашых душах і ў памяці ды сталася нам на збаўленне, а душам чысцовым на палёгку.

Маці, Валадарка свету, што мукі з Сынам дзяліла, маліся за нас грэшных, за душы памерлых, у чысцы замкнёныя! Амэн.

Можна закончыць Крыжовы шлях малітвай за памерлых.

Абавязковыя святы

 Кожны католік абавязаны ўдзельнічаць у Святой Імшы кожную нядзелю, а таксама ў наступныя ўрачыстасці і святы:

Святой Багародзіцы Марыі – 1 студзеня.

Аб’яўленне Пана (Тры Каралі) – 6 студзеня.

Святога Юзафа – 19 сакавіка.

Унебаўшэсце Пана – з календара рухомых святаў.

Цела і Крыві Хрыста (Божага Цела) – з календара рухомых святаў.

Святых апосталаў Пятра і Паўла – 29 чэрвеня.

Унебаўзяцце Найсвяцейшай Панны Марыі – 15 жніўня.

Усіх Святых – 1 лістапада.

Беззаганнага Зачацця Найсвяцейшай Панны Марыі – 8 снежня.

Нараджэнне Пана – 25 снежня.

(пар. Кодэкс Кананічнага Права, кан. 1246, § 1)

Каляндар важнейшых рухомых святаў

2008	6 лют.	23 сакав.	1 мая	11 мая	22 мая	30 ліст.
2009	25 лют.	12 красав.	21 мая	31 мая	11 чэрв.	29 ліст.
2010	17 лют.	4 красав.	13 мая	23 мая	3 чэрв.	28 ліст.
2011	9 сакав.	24 красав.	2 чэрв.	12 чэрв.	23 чэрв.	27 ліст.
2012	22 лют.	8 красав.	17 мая	27 мая	7 чэрв.	2 снеж.
2013	13 лют.	31 сакав.	9 мая	19 мая	30 мая	1 снеж.
2014	5 сакав.	20 красав.	29 мая	8 чэрв.	19 чэрв.	30 ліст.
2015	18 лют.	5 красав.	14 мая	24 мая	4 чэрв.	29 ліст.
2016	10 лют.	27 сакав.	5 мая	15 мая	26 мая	27 ліст.
2017	1 сакав.	16 красав.	25 мая	4 чэрв.	15 чэрв.	3 снеж.
2018	14 лют.	1 красав.	10 мая	20 мая	31 мая	2 снеж.
2019	6 сакав.	21 красав.	30 мая	9 чэрв.	20 чэрв.	1 снеж.
2020	26 лют.	12 красав.	21 мая	31 мая	11 чэрв.	29 ліст.
2021	17 лют.	4 красав.	13 мая	23 мая	3 чэрв.	28 ліст.
2022	2 сакав.	17 красав.	26 мая	5 чэрв.	16 чэрв.	27 ліст.
2023	22 лют.	9 красав.	18 мая	28 мая	8 чэрв.	3 снеж.

Старонка абноўлена: 10 сакавіка 2006 

Пры выкарыстанні матэрыялаў сайта спасылка на Catholic.By абавязкова.